Тиорэд хэгъэгум щызэхахы

0
824

Урысыем итворческэ ансамблэхэм яфестиваль лауреат щыхъугъэ «Уджыр» хэгъэгум щыцIэрыIу. «Шэн-хабзэхэр» зыфиIорэ зэнэкъокъум Урысыем иансамблэ 263-рэ хэлэжьагъ, шъолъыр 84-мэ ахэр ащэпсэух. Лъэпкъ проектэу «Культурэм» грантыр къыщыдэзыхыгъэ «Уджым» ихудожественнэ пащэу, Адыгэ Республикэм изаслуженнэ артистэу Къэлэкъутэкъо Инвер гущыIэгъу тыфэхъугъ. 

-IэпэIасэм иеджапIэ зэрэзэхэтщэгъэ шIыкIэр эфирым занкIэу къыщагъэлъэгъуагъ, – къыIуагъ Къэлэкъутэкъо Инвер. — Лъэпкъ искусствэм ифольклор къыхэтхыгъэ произведениехэр ансамблэм пае зэдгъэфагъэх. 

«Абрэдж Нухь», «Шапсыгъэ зэфакIу», «Си Марет» ансамблэм къыригъаIохэзэ ижъырэ адыгэ орэдхэр цIыфхэм алъегъэIэсых. И. Къэлэкъутэкъом зэрэхигъэунэфыкIыгъэу, пэсэрэ адыгэ музыкальнэ Iэмэ-псымэхэу шыкIэпщынэр, сырынэр, къамылыр, нэмыкIхэри тызхэт лъэхъаным игъэкIотыгъэу агъэфедэх. 

Адыгэ орэдхэм купкIэу яIэр, орэдышъохэр мыцунтхъагъэхэу цIыфхэм алъыгъэIэсыгъэнхэм фэшI лъэпкъ музыкальнэ Iэмэ – псымэхэмкIэ зэрагъэжъынчыхэ­рэм мэхьэнэ хэхыгъэ иIэу Инвер елъытэ. 

  

Орэдышъор агъэжъынчы 

«Уджым» пщынаоу хэт ащ ихудожественнэ пащэу Къэлэкъу­тэкъо Инвер. Урысые Федерацием, Пшызэ, Адыгэ Республикэм культурэмкIэ язаслуженнэ Iофы­шIэу, Урысыем икомпозиторхэм я Союз хэтэу КIыргъ Юрэ шыкIэпщынау, ищыкIагъэ хъумэ пщы­нэмкIэ, къамылымкIэ орэдышъор ансамблэм къыщырегъаIо. Иорэдхэр Урысыем щэIух. 

ШъэуапцIэкъо Адам Адыгэ Республикэм культурэмкIэ изаслуженнэ IофышI, Теуцожь Цыгъо ыцIэкIэ агъэнэфэгъэ медалыр къыфагъэшъошагъ. А. ШъэуапцIэкъом IэпэпщынэмкIэ орэды­шъор къырегъаIо. 

ПхъэкIычаор Темрыкъо Адам, Теуцожь Цыгъо имедаль къыфагъэшъошагъ. Мышъэ Аслъан сырынапщ, Тыкъо Рустам Iэпэпщынэшхом фэгъэзагъ, ШъхьакIумыдэ Хьаджыслъан шъонтырпау. 

  

ЕплъыкIэхэр 

Чъэпыогъум и 27-м зэхащэгъэ IэпэIасэм иеджапIэ хэлэжьагъэх Теуцожь, Джэджэ, Шэуджэн, Красногвардейскэ районхэм къа­рыкIыгъэхэр. 

-IэпэIасэм иеджапIэ зэрэзэхащагъэр лъэшэу тыгу рихьыгъ, ансамблэу «Уджым» хэтхэм ясэнэ­хьат хэшIыкI ин фыряI. ЗэкIэми «тхьашъуегъэпсэу» ятэIожьы, – къыIуагъ Красногвардейскэ рай­оным щыщэу Бырдж Фатимэ. 

Шэуджэн районым щыпсэурэ ШъэоцIыкIу Рэмэзан ансамблэм хэтхэм афэраз. Музыкальнэ Iэмэ-псымэхэр хэшIыкI фыряIэу артистхэм агъэфедэхэу ащ ылъытагъ. 

  

«Уджыр» цIэрыIу 

Урысыем и Мафэ фэгъэхьыгъэ зэхахьэу Тыркуем щыкIуагъэм «Уджыр» хэлэжьагъ. Дунэе фести­валэу ижъырэ къалэхэм яхьылIагъэу Рязань щызэхащагъэм ансам­блэм тиорэдышъохэр щигъэIугъэх. 

Культурэм, искусствэм яIоф-тхьабзэу «Алтын Майдан» зыфиIоу Къырым щыкIуагъэм «Уджым» иIэпэIэсэныгъэ къыщигъэлъэ­гъуагъ. ПсэупIэу ПсышIуапэ концерт гъэшIэгъон ансамблэм къыщитыгъ. 

– Краснодар, Мыекъуапэ, Налщык, Санкт-Петербург, Мос­ква, Калугэ, Щэрджэскъалэ, Рос­тов-на-Дону, нэмыкIхэм «Уджыр» ащы­Iагъ, – къеIуатэ композиторэу, орэдыIоу, музыкантэу КIыргъ Юрэ. – Адыгэхэм ятарихъ, яискусствэ лъэпкъхэм алъытэгъэ­Iэсы. Тызпылъ Iофыр лъэшэу тыгу рехьы. КъытэдэIухэрэм тафэраз. 

Чъэпыогъум и 27-м, пчыхьэм «Уджым» иконцертэу Тэхъутэмыкъуае культурэм и Унэшхоу дэтым щызэхащагъэр эфирымкIэ занкIэу къагъэлъэгъуагъ. Сергей Шперовыр, Хьагъур Нурет, ХьакIэцIыкIу Мае, Мышъэ Азидэ, Ацумыжъ Адам орэдхэр къаIуагъэх, Шъэфрыкъо Адам зэхахьэр зэрищагъ. 

-Адыгэ Республикэм и ЛIышъхьэу КъумпIыл Мурат, республикэм культурэмкIэ и Министерствэ, Тэхъутэмыкъое районым иадминистрацие, зэкIэ IэпыIэгъу къытфэхъухэрэм, «Уджыр» зышIогъэшIэгъонхэу къытэдэIухэрэм гъэзетымкIи «тхьашъуегъэпсэу» ятIожьы тшIоигъу, шIоу щыIэр къадэхъунэу сафэлъаIо, – къытиIуагъ Къэлэкъутэкъо Инвер. 

УапэкIэ лъыкIуат, тыгъэгушIу, дгъэлъэпIэрэ ансамблэу «Уджыр»! Къэралыгъо гъэпсыкIэ иIэу Адыгеир зыпсэурэр илъэси 100 зэрэ­хъурэм фэгъэхьыгъэ зэхахьэхэм уахэлэжьэнэу зыогъэхьазырышъ, республикэм ищытхъу нахь лъагэу пIэтынэу, музыкальнэ искусствэм хэхъоныгъэу фэпшIырэр къы­отэжьынэу, лъэпкъхэр тапэкIи зэфэпщэнхэу Тхьэм тыпфелъэIу.

(Адыгэ макъ) 

CEVAP VER

Lütfen yorumunuzu giriniz!
Lütfen isminizi buraya giriniz