Надия щхьэгъубжэр хуиту къызэIуихри акъужь щIыIэтыIэм пэшыр хуит хуищIащ. Гу лъитащ уафэ къащхъуэм лъагъуэ хужь пхишым. Лъагъуэр хуитщ, бгъуфIэщ, уи нэр нэплъыскъым. Дэнэ нэс унишэсыну а лъагъуэм?! Сэри си лъагъуэщIэм нобэ сытеувэнущ. Надия и гупсысэр анэм и макъ щабэм къызэпиудащ:
-Надия, ухьэзыр? Уи адэр къожьэ.
-СынокIуэ, мамэ.
Надия псынщIэу зигъэхьэзырри и пэшым къыщIэкIащ. Пщащэ цIыкIум и гукъыдэжым дуней псом зыдищIу къыпщыхъут. Лъагэу зызыIэта дыгъэр и бзий щабэхэмкIэ гуапэу къедэхащIэрт, къыхуэгуфIэрт. Къуалэбзу цIыкIухэм я уэршэр дахэмкIэ пщащэр ягъэгушхуэрт.
Куэд лъандэрэ зыщIэхъуэпсам гъунэгъу хуэхъуа пщащэ цIыкIум гуфIэгъуэм и щхьэр дэуназэрт.
И адэм дэщIыгъуу Надия машинэ псынщIэм итIысхьащ. Нобэ и тхылъыр щIилъхьэнущ фIэфIу къыхиха еджапIэм. Абы и мурадщ дохутыр IэщIагъэм хуеджэну.
Машинэ псынщIэр гъуэгу зэхэкIыпIэм щынэсым къэувыIащ. Надия и нэр гъуэгум тенащ. ЗимыIэжьэу Надия машинэм къицIэфтащ. Къэхъуар адэм къыгурыIуакъым. Псори напIэзыпIэт!
Машинэ хьэлъэм пэщIэлъадэ сабийр гъуэгум къытридзыну Надия хунэсащ, ауэ езым и лъакъуэм машинэ хьэлъэр ирикIуащ. Пщащэр псынщIэу сымаджэщым нагъэсащ. Дохутырхэм жаIэшхуэ щыIэтэкъым. Нэхъ иужьыIуэкIэ къыIухьа напщIэуфэ дохутырым хъыджэбзыр къызэпиплъыхьри фIы лъэпкъ жиIатэкъым. Псалъэхэр хьэлъэт: лъакъуэр пыхын хуейщ, зыри хъужынукъым, операцэм хуэвгъэхьэзыр.
Дэнэ кIуэжа къыщыгуфIыкIа дыгъэбзийхэр, фIым щызыгъэгугъа къуалэбзу бзэрабзэхэр? Дунейр кIыфIт, щымт.
Дауэ мыхъуами, Надия насыпыншэтэкъым.
Гъунэгъуу блэкI дохутырым пщащэ цIыкIур къецIыхужри къоIущащэ: «Уи лъакъуэм йумыгъэIусэ». ДохутырыфI гуэрым и цIэмрэ унэцIэмрэ къыжреIэ. Узыгъэгушхуэщэн щымыIэми, пщащэм и гур къызэрыгъуэтыжащ.
Адэм къыхуиша дохутырыр Надия гупсэхуу къеплъащ, операцэм хуагъэхьэзырыну унафэ ищIащ.
Надия и Iэр хъыджэбз цIыкIу къригъэлам гуапэу иIыгът. Сабийм гугъэщIэхэр, къаруущIэхэр къыхилъхьэрт, гукъыдэж къритт Надия, гъащIэм щигъэгуфIыкIт: зы цIыхупсэ ажалым щысхъумащ!
Аддэ жыжьэу дыгъэм и бзийр Надия къылъоIэс, къодэхащIэ, гуапэу къоIущащэ: «Псори тэмэм хъунущ»…
Тхыгъэр зейр: Джатэжьей Миланэ Марат ипхъу, Табыхъу Хь.Къ. и цlэр зэрихьэу Анзорей дэт курыт еджапlэ.
ЕгъэджакIуэр: Къуэкъуей Оксанэ Данил ипхъу.
