Бэдзэогъум и 14-м сыхьатыр 3-м КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ ар щыкIощт. Къэгъэлъэгъоныр къызэIуахыщт Къэбэртэе-Бэлъкъарым исурэтышIхэу Якъубэрэ Сиярэрэ. Ащ хэхьащтых илъэс 40-м къыриубытэу сурэт зэмылIэужыгъоу ашIыгъэхэр.
Аккизэ Якъубэрэ Сиярэрэ ятворчествэ тихэгъэгуи, IэкIыбыми ащызэлъашIэ. Якъубэ Аккизэ (1942 — 1994 илъ.) апэрэ бэлъкъар сурэтышI Iазэмэ ащыщ, КъБР-м изаслуженнэ сурэтышI ыкIи КъБР-м исскуствэм ылъэныкъокIэ и Къэралыгъо премие илауреат. СурэтышI бэлахьыр Къэбэртэе-Бэлъкъарым иижъырэ лъэпкъ культурэрэ джырэ дунаим къыхэхьагъэмрэ зэзыпхыгъэ сурэтышIхэм ащыщ. Ащ сурэтшIыным илъэныкъо зэфэшъхьафхэр IэкIэлъых КъБР-м игерб ышIыгъ, тхылъишъэм ехъумэ язэгъэпэшын дэлэжьагъ.
ИгъэшIэ гъогу чIыпIэшхо щаубыты къушъхьэхэм. Ахэм агъэсагъ пкъыгъом иинагъэрэ игъэпсыкIэрэ исурэтхэм къащигъэлъэгъошъунэу. Сыд фэдэ сурэт ышIыгъэми, илъэпкъ итхыпхъэ имэхьэнэ куу хелъхьэ.
Якъубэрэ Сиярэрэ зэготхэу, зыкIыныгъэ ахэлъэу илъэс щэкIым ехъурэ Iоф зэдашIагъ. Язакъоуи зэгъусэхэуи сурэтэу ашIыгъэхэр республикэм иискусствэ идышъэ фонд хэхьагъэх. Джащ фэдэу Якъубэрэ Сиярэрэ сурэтшIынымкIэ унэгъо лIэуж агъэпсыным ублапIэ фашIыгъ.
Сиярэ ишъхьэгъусэ дунаим зехыжьым, яхудожественнэ творчествэ хабзэу фашIыгъэр ежь лъигъэкIотагъ. ИIофшIагъэхэм илъэпкъхэу Дагъыстан Республикэмрэ Къэбэртэе-Бэлъкъарымрэ якультурэ ифэмэ-бжьымэ куу апхырыщыгъэу, IэубытыпIэ ышIыхэзэ къыригъэлъэгъукIыгъэх. Аккизэ Сиярэ исурэтхэр гъэшIэгъоных: зэм ошъопщэ хъопсагъом псынкIэу ущесы, зэм образ зэфэшъхьафхэм уахэткIухьэу уралъэсажьэ. ЗэкIуныгъэ, зыкIыныгъэ апхырыщыгъэу, ятеплъэкIи ашъохэмкIи къызэкIухэу, лъагъом игъунапкъэхэр гъунэнчъэу, дэхэныгъэм илъэой уфащэу сурэтхэр шIыгъэх.
Исабыигъом къыхэхыгъэ сюжетхэр, къызщыхъугъэ чIыпIэм ичIыопс идэхагъэ, Дагъыстан изы чылэ гупсэу, зэкIэупкIэгъэ цIыкIоу Верхний Чегем фэгъэхьыгъэх иIофшIагъэхэр. Бзылъфыгъэм идэхагъэ къыригъэлъэгъукIы хъумэ, нэр пIэпихэу узыIэпещэ, мэфэкI къашъом ухэтым фэдэу урелъэсажьэ. ЩыIэныгъэм имэфэ къызэрыкIо къыхэхыгъэу, цIыфыр къэзыуцухьэрэ пкъыгъохэм якъигъэлъэгъукIын, псэушъхьэхэм, пцэжъыехэм ясурэт шIын цIыф жъугъэхэр нахь пэблагъэ ешIых. Ахэм къаушыхьаты цIыфыр дунаишхом изы Iахь цIыкIоу зэрэщытыр.
УсэкIо цIэрыIоу Кияс Меджидовым ыпхъоу Аккизэ Сиярэ (1943-рэ илъ.) художественнэ сэнэхьатымкIэ апшъэрэ гъэсэныгъэ зиIэ апэрэ дагъыстан бзылъфыгъ. 1965-рэ илъэсым къалэу Махачкала дэт Дагъыстан художественнэ училищыр къыухыгъ.1975-рэ илъэсым Аккизэр Урысыем исурэтышIхэм я Союз хэхьагъ. Ар урысые, IэкIыб сурэт къэгъэлъэгъонхэм ахэлэжьагъ, играфическэ сурэтхэр Польшэм, Болгарием, Германием (Баден-Баден) къащигъэлъэгъуагъ.
Исурэт шIыгъэхэр джащ фэдэу ащалъэгъугъэх къалэхэу Москва, Налщык, Пятигорскэ, Киев, Грознэм, Тбилиси, Махачкала, Мыекъуапэ.
Ар дунэе экспозициеу «Золотая палитра» зыфиIорэм ылъэныкъоу «Эксперимент в живописи» зыцIэм къыщыхагъэщыгъ, КъБР-м инароднэ сурэтышI, Дунэе академием иакадемик. Аккизэ Сиярэ сурэтышI IэпэIас, щыIэныгъэ гъогу гъэшIэгъон къэзыкIугъэ, ибзылъфыгъэ насып лъагэу, шIу ылъэгъурэ цIыфым шъыпкъэныгъэ фыриIэу, иIоф хьалэлэу фэлэжьэрэ цIыф. (Адыгэ макъ)
Сурэтхэр: КъокIыпIэм имузей
