Миллион къылэжьыгъ

0
408

Адыгэ Республикэм ныбжьыкlэ чанэу исыр макlэп. Урысые зэнэкъокъу пчъагъэхэм зэрифэшъуашэу ахэм закъыщагъэлъагъо, текlоныгъэ къыдахы. Ахэм ащыщ Мыекъопэ къэралыгъо технологическэ университетым итехнологическэ факультет щеджэрэ Павел Дорошенкэр.

Сыдигъокlи ишlэныгъэхэмкlэ ар къахэщы, республикэм имызакъоу, Урысыем щызэхащэрэ lофтхьабзэхэм чанэу ахэлажьэ. Бэмышlэу Урысые студенческэ зэнэкъокъоу «Твой ход» зыфиlорэм хэлэжьагъ, ифинал ихьагъ ыкlи текlоныгъэ къыдэзыхыгъэхэм ащыщ хъугъэ. Сомэ миллион Павел къыфагъэшъошагъ.

Зэнэкъокъум ифинал Шъачэ щыкlуагъ. Мэфищым Урысыем ичlыпlэ зэфэшъхьафхэм къарыкlыгъэ ныбжьыкlэхэр зэнэкъокъугъэх. Ежьхэм яшlошlыкlэ, джырэ апшъэрэ еджапlэхэр зыфэдэн фаер къыраlотыкlыгъ.

– Мы зэнэкъокъур зэрэзэхащэрэр тиапшъэрэ еджапlэ къызыщаlом, сшlогъэшlэгъон хъугъэ. Нахь игъэкlотыгъэу ар зэзгъэшlагъ, сыхэлэжьэнэу мурад сшlыгъэ. lофшlэнэу бгъэцэкlэн фаехэр сэ сызыпылъ lофым епхыгъэхэти, шlуагъэ зэрэпылъыщтыр къызгурыlуагъ. Ащ дэжьым мыщ фэдэ шlухьафтын пылъыми сшlагъэп. Апшъэрэ еджапlэхэм агъэфедэрэ методикэр игъэкlотыгъэу зэзгъэшlагъ, непэрэ мафэм гумэкlыгъоу къэуцухэрэм нахь защызгъэгъозагъ, ушэтын lофшlэнхэр зэхэсщагъэх, – еlо Павел.

2030-рэ илъэсым нэс апшъэрэ еджапlэхэм lоф зэрашlэщтым фэгъэхьыгъэ lофшlэнэу Павел ыгъэхьазырыгъэр анахь дэгъоу алъытагъ, балл анахь иныр къырихыгъ ыкlи текlоныгъэ къыдихыгъ.

– 2018-рэ илъэсым мыщ фэдэ зэнэкъокъу сыхэлэжьэгъагъ, джащ дэжьым джыри къэзгъэзэжьынэу зэсlожьыгъагъ. Гущыlэу зэстыжьыгъэр къэззгъэшъыпкъэжьыгъ. Мэфищым шlэныгъэу тиlэхэр къэдгъэлъэгъуагъэх. Финалым ихьэгъэ нэбгырэ миным тызэнэкъокъугъ. lофшlэнэу къытатыгъэхэр къиныгъэх, экспертхэм ыкlи компание зэфэшъхьафхэм япащэхэм lоф адэтшlагъ. Текlоныгъэ къыдэсхыгъэу къаlуи сценэм сыкъызытыращэм, сыгу ихъыкlыщтыгъэр къэlогъуай, джыри сшlошъ хъущтыгъэп, – къытфеlуатэ Павел.

Кlэлэ ныбжьыкlэм къыфагъэшъошэгъэ ахъщэр зэригъэфедэщтым бэрэ егупшысагъэп, иlофшlэн хигъэхъонэу мурад ышlыгъ. Шlэныгъэу ыгъотыгъэхэмкlэ илэгъухэм, кlэлэеджакlохэм адэгощэщт. «Неформальное образование» зыфиlорэ лъэныкъоу зыдэлажьэрэм нахь зыригъэушъомбгъущт, гурыт еджапlэхэм ащеджэхэрэм апае проект зэхигъэуцощт. Мэзаем е гъэтхапэ мазэм адэжь lофшlэныр рагъэжьэщт. Джырэкlэ lоф зышlэщтхэр къыхахых. Шlоигъоныгъэ зиlэ пстэури якlолlэн алъэкlыщт.

Джащ фэдэу Урысые лъэпкъ премиеу «Студент года–2021» зыфиlорэм ифинал ихьагъэу Павел Дорошенкэр мы мафэхэм ащ хэлажьэ. «Общественник года» зыфиlорэ лъэныкъом ифинал зыщиушэтыщт. Павел «Урысыем иныбжьыкlэхэм я Союз» зыфиlорэ общественнэ организацием и Адыгэ шъолъыр къутамэ ипащэ игуадз. 2019-рэ илъэсым Урысые Лъэпкъ премиеу «Студент года-2019» зыфиlорэм иуцугъохэм ащыщ текlоныгъэ къыщыдихыгъагъ, 2020-рэ илъэсым Мыекъопэ къэралыгъо технологическэ университетым ипрезидент игрант къыфагъэшъошэгъагъ. Илъэс зэкlэлъыкlохэм Урысые Лъэпкъ премиеу «Студент года» зыфиlорэм игъэцэкlэкlо пащ, урысые проектэу «Тренинг- марафон» ыкlи «Оштен» зыцlэхэм япрограммнэ пащ.

Адыгэ Макъ

CEVAP VER

Lütfen yorumunuzu giriniz!
Lütfen isminizi buraya giriniz