ЙЫНХАРА ДЖЬАУАПКIРАЛА ДАДГЫЛИТI

0
168

Асаби заджвы дихъапшылуа, ауи дйапшхара йтахъыта йынцIра ззынайырхуш аъачIвагIа ангIалихуа агIан ауи йымгIва дантагылуагьи гIаншитI. Ауат дрылапхьадза ауаштI МАХIВАЖВ Артур МухIадин й пагьи. Ауи йъачIвагIа гIалхра апны швапхата дизалтI апрофессор, амедицина наукаква рдоктор Татаршвауа МухIарби ХIаджьбакьыр йпа.
Артур асквш 1986 агIан Псыжв кыт дйытI, апхьарта амщтахь Ростов къральыгIва медицина университет дыцIалтI.
Асквшква 2009–2010 рагIан интернатура, йынцIра аурала швапха гIазхъихуаз айъазагIв Татаршвауа МухIарби унашва зхъицIауа «Общая хирургия» хъвшара апны дгIалгахтI. УахьчIвала МахIважв Артур ареспублика чымазагIвтара йаланакIуа ащацага
Квта апны айъазагIв рентгеноэндоваскулярна хирургта дынхитI.
– Сара йпщбахауа акласс сапхьауата, Псыжв акультура Тдзы апны хIкытлагIв, айъазагIв бергьльы Татаршвауа МухIарби ХIаджьбакьыр йпа йдоктор диссертация анихча йзадыргалыз агвыргъьахъв апхьагIвчвагьи хIдырцатI. Ауи амш лахIвара щарда гIасыланацIатI, айъазагIв йгIатгараква джьасщауа, саргьи сайъазагIвхарныс стахъыта сгвы йтаскIытI. Ауи азаман йгIашIарышвта йгIалсхыз аъачIвагIа зынгьи сгьамайгIваджьхтI, – йхIвитI Артур.
АчкIвын йдырраква йрылайырхIауата йызнымкIва Москва апхьара даъан, Голландия апны йынхара йапщылу аметодика шIыцква тшрыхайыргIвазатI. Артур йшихIвауала, тшыззибжьаз аметодикала закIы-гIвба ракIвпI ркъьарата йакIвдыршаз, акврыдзраква дупIта, йыгьрызгIарысабапуам, апхъала ауыгьи йазынадзушта дайгвгъитI.
– ЙгIауахвырквын, йхIырхъйауа ауыс ауи аъара йыгьбаргвым, рыцIа уызрыгIапсауа хIынхара йапщылу аджьауапкIра акIвпI.
АгIвычIвгIвыс йынцIра хIара хIынхаща йшапщылу абгата йхIылахIхIвитI.
Инфаркт зхъыста йгIадырдзауа ачымазагIв йынцIра хIара хIдырраква, хIазъазара йапщылахитI, – йхIвитI МахIважв Артур.
АйъазагIв йшгIаликIгIазла, адунейлагьи хIкъральлагьи агвы, ахъаквынцI йапщылу азгIваква абзазагIвчва зымгIва рацкIыс рыцIа щарда йрыхьуа йрылапхьадзапI.
– Ауи йапшу азгIваква йыргауа ауагIа рпхьадзара надыркъвра ахъазла хIкъраль аунашвачпагIвчва йапшым амальква нарахвуата афедеральна программаква абзазара йаларжьитI. ХIреспублика аунашвачпагIвчвагьи ауи амальква гIадрысабапын, ауыжвгIанчIви технологияквала йадгалу ащацага Квта гIахъыртIытI. Асквш 2011 агIан а-Квта ангIахъыртIы йгIашIарышвта хIреспубликала ауи азгIва йагауа ауагIа рпхьадзара йалдзгIатI, – йрыбагъьитI ауи.
Артур йшихIвауала, агвы-щацага згIваква зхьуа ачымазагIвква рныбыжьлагьи рыцIа йшIахитI. Инфаркт сквш 50 – 60 йырту ракIвпI рыцIа щардата йызхъысуа, ауаса йцIыхъвахауа асквшква рыцIа йайцIбаквугьи йрыхьуа йалагатI.
– Инфаркт ахъачва ракIвпI рыцIа йыззычвгьу. Ауи гIазлыцIуа гьапшым. ТгIачвала йрыхьырнысгьи ауаштI. Зхолестерин хIагIугьи, фачыгIв диабет зхьуагьи, тутын зчвауагьи, аркъа зжвуагьи йашIамсуата рыгвква йырхьпшра атахъыпI. ХIара йгIахIрысабапуа астентква адуней апныла зымгIва рацкIыс знадзара хIагIу йрылапхьадзапI, ауи швабыжта хIайгвыргъьитI, – йрыбагъьитI ауи.
Ауи йшихIвауала, згвы зны йахьпшыз ачымазагIвква айъазагIвчва йырхIвауа ащардагIв йыгьдырхъйум. Ауат ачымазагIвтара йгIайта ужвыгьи ркъьаракI рчпара шатахъугьи йыгьгIахъынхIвыхуам, ргвы йгIаквнарышвындзыкIьара йырчхIитI. Ауи дара рызгIвадарагьи йазарархитI, айъазагIвчва руысгьи рыцIа йарыбаргвитI. Ауи йгIалцIла, айъазагIвчва йырхIвауа дырхъйара, рхъа йшахьпшуашла Артур абзазагIвчва тшырзынайырхитI. АчкIвын дызцынхауа агвып швабыжта ацацхърагIари абагвынгIври рызбжьапI. ЙцIыхъвахауа асквшква айъазагIвчва шIаква рпхьадзара йалахIитI.
УахьчIвала Артури йхъапщыли хгIвысабичва – Амина, Алим, Марйана – гIадзындыргылитI. Ауи йгIариква медицина амгIва гIалырхырныс йгьитахъым. Йшипхьадзауала, хIкъраль амедицина йшатахъу апшта йнархъата йгьадыргалуам, ауи йгIалцIла, айъазагIвчва руыс рхъйара баргвхитI, рдырраква абгата йызлагIадырбуш, рынхара апны йгIадрысабапуаш атехнологияква зымгIва гьнахъум. АгIвычIвгIвыс датша къраль даъата анхара ащтацаща шщаквгылу зшIуырпшуаш датша швапха анйыму йхъвыцщагьи датшахитI. Ага ауаса йаъазтынгьи, хIреспублика апны йынхауа ащацага Квта уыжвгIанчIви технологияквала йшадгалу йхIвитI, арахьарат ашIыпIаква рчымазагIвтараква йрымам аъамапсымаква йрыланхитI. АгIвычIвгIвыс йынцIра гIархчара ахъазла йыртахъу зымгIва рымапI. Артур айъазагIвта дынхауищтара жвасквшакI аъара цIуаштI. Ауи йпщбахауа акласс агIан йгIалихыз аъачIвагIа, йаба МухIадини йан Аради рсаби йчвхIатлахарнысла йахъгвыргIвазтынгьи, айрышта йыгвтара дазычIвырхъатI. УахьчIвала МахIважв Артур дызцынхауа агвып пIатIу йыквырцIитI, швапха гIайхъырхитI. Хъартшхъвара злам ачкIвын зынцIра гIайхчаз ачымазагIвква рпхьадзара швабыжта йщардапI. Ауат зымгIва йзыразта пхата йыхьыз рхIвитI, аразыра ажваква йзынадыритI. Здырраква цIолу, зынхара йапщылу аджьауапкIра абгата йзылазхIвауа МахIважв Артур дзайъазауа ачымазагIвквагьи рыгвква йъазу анапIква «йшырнапIыцIашваз» йазхъарцIитI.

Агба Инна.

(АБАЗАШТА)

CEVAP VER

Please enter your comment!
Please enter your name here