Абаза ҳәызбақәа

0
1346

Апроект «Амазара» авидео ҿыц ҭыҵит

Абазаква хIваспа шырчпауа йгIаквчважвауа абзазара йгIахъыху афильм апсуа-абаза уагIахъа ргвбайара ахчара йазынарху Адуней апсуа-абаза конгресси «Алашара» жвлара адкIылари рпроект “Амазара” йащтагIайуа йахъвхатI.

Апсуакви абазакви ргвбайара ахчара йазынарху «Амазара» проект видео шIыцкIла йазхIатI. «Алашара» жвлара адкIылара акъаруквала абазаква йцIасу рхIваспачпара йгIаквчважвауа абзазара йгIахъыху фильм хъырхтI.

Черкесск апны йгIаныршу «Алашара» ахъвшара аунашвачпагIв йтарагылыгIв Гьадыгв Мурат йшгIаликIгIазла, ауи апш фильм хъырхныс щарда цIуата ргвы йтан, ауи агвтара ауагIахъа уысквала КъЧР а-Министерства ацхърагIарала йдырхъйарнысгьи йаквдырпшуан, ауаса йапшым ашвхIаусыгIваквала ауыс гьаквымшватI. Арыла Эгьзакь Мусса йгIаджвыквцIарала Адуней апсуа-абаза конгресси «Алашара» жвлара адкIылари апсуа-абаза уагIахъа ргвбайара ахчара йазынарху апроект «Амазара» джвыкврыжьтI. Ауаса йанца ахIваспачпара йгIаквчважвауа абзазара йгIахъыху акино ауыс “Амазара” проект апкъ йтата йырхъйа йауашта йалтI.

«Апсуа-абаза уагIахъа ркультура йджьащахъву хъвыкIта йалаз, ауаса йыдзныс апны йнадзаз ауи анапIылачпара гIахIырбарныс щарда цIуата йхIтахъын. Ужвы ауи Мусса ХIабальа йпа йбзирала йгIащаквгылхтI йыгьгьитшауацIнахитI. Ауи нхагIв ъазакI дицхърагIатI. ХIара анхагаква хIхвгIатI, аъаза дъанхушыз пещ йзадыгIгалтI, йаргьи тшызбжьарныс зтахъкву азикIуа далагатI, ауат быжьгIвы йнайырдзахьатI», – йхIватI Гьадыгв Мурат.

Ага абазаква рхIваспачпара гIащаквгылхуа йцазтынгьи, ауи йазычпу анхагIвчва рпхьадзарагьи йалахIузтынгьи, Мурат абазаква йынкъвыргуз ахIваспа шырчпауа «адуней йдырбара» магIны амата йпхьадзитI,
«Авидеоролик ауи анапIылачпара йамагIну, йшгIаншаз, абазаква ауи йшазъазаз, айха йшадынхалуаз, абджьар шырчпуз йгIаквчважвитI. ХIваспа йгьи напIыркIыра квпшырата йаъакву, ахIваспа шдрыцIаруз, тара шазырчпуз, дамыгъа шаквырцIуз гIанахIвитI», – йгIашIипхьадзатI «Алашара» ахъвшара аунашвачпагIв йтарагылыгIв.
Гьадыгв Мурат афильм алабаша шгIаншаз йазынарху шIчIваракIгьи шалу даквгIашIастI.

«Алашара» ахъвшара аунашвачпагIв йтарагылыгIв йшихIвазла, афильм хымызкI аъара Черкесск къали АлбыргIан, Къарапагва, Дарыкъвакт кыткви рпны йхъырхуан. Ауи ащтацаща пасата йазхъвыцызтIхIва, йшыншалауа апшта, йъадзахъырхуаз псахрагьи аларцIун.

«Аматериал шабгу азукIкIырныс гьмайрамызтI. Афильм ъачIвагIагIвта быжьгIвы, актерта жвагIвы алапI. Ауи йадынхалтI йбергьльу абаза макъымршIыйагIвчва, ашвахIвагIвчва, апхьарцасчва. Афильм йазалхта ашва азаларцIатI. Йшабгу йгIауахвырквын ауи уагIата 25-гIв адынхалтI», – йхIватI Гьадыгв Мурат.
Ауи йгIаликIгIатI абзазара йгIахъыху акино гвацчпа хъвквакIгьи шалу – ауат апхъазаман аъаща рыцIа йуылаухIварныс йгIауцхърагIитI, ахIваспачпара амагIынгьи йалыргата йгIаудырбитI. Гьадыгв Мурат йшихIвауала, ауат ахъвква рхъыхра акIвын рахIа йбаргвыз.

Апсуа-абаза уагIахъа ргвбайара йазынарху Адуней апсуа-абаза конгресси «Алашара» Дуней адкIылари рпроект “Амазара” ауагIахъа литератури абызшви, ауагIа рнапIылачпаракви апхъанчIви цIаскви йгIарквычважвауа ужвыгьи ахъвква ащтагIайуаштI. Ароликква Апсни Къарча-Черкеси рпны йащтацауата йхъырхуаштI. (www.abaza.org)

CEVAP VER

Lütfen yorumunuzu giriniz!
Lütfen isminizi buraya giriniz