АМХIАДЖЬЫРКВА
Ауахъ гIайитI. Амца блитI.
АшвабжьыкI сара йгIасгвыквгIвитI.
Ауи ашва саздзыргIвитI,
СшаздзыргIвуамца схъвыцра джвыквлитI.
Аладзцыраквала йхърыс
АжвгIванд схъадзгылапI чатырта.
Рбжьы гIасгвыквгIвитI са шIыц-шIыц
АмхIаджьырква, амхIаджьырква.
«Марджьа ей! – хIва сцIритI сара,
Ржьы швымфан швара швсабиква.
ШвгIахъынхIвых ! Датша зджьара
Йрагььта йгьаъам швыщхъа цриква!»
Сбжьы гьыргIум! СгIахьшватI, сгIахьшва…
ЙхъыччитI агIымстаква, ахIква.
Йхъылын Атенгьыз КвайчIва
АпстхIва йаладзхитI ахъвыхIква.
СгылапI атенгьыз атшпы,
Сбжьы гьыргIум, йаквтштшитI асквшышвква.
ЙгIаситI абыхъв агвытшпы
Атолкъвынква, йуышвуа рпрычвква.
Абыхъв йгIаддрышвлитI ауат
Ахъвадиква, ахъвадиква…
Швхакв швазгIайхтI… ШвгIалатI, швгIалатI,
ТшхъзырчIвагвачвыз сара сцриква…
АмхIаджьыр рыцхIа йхъвади
ЙауацIыхта йыквпI ахIацIкъьа…
РыцIа йынасыппI ауи
Йбзата йхъыскваз зымгIва рацкIыс…
МЫХЦ Кьарим,
«ГIагвалашвахра» поэма йгIалхпI.
