Бирæгъызæнг
Хъæриу-хохы риуыл ис фидар гæнах –
æнусты йыл зилы историйы цалх:
æгайнæг хъæд аивæзт… æдзæрæг кæмттæ, –
Хæл-хæлæй кæм уайынц æгæнон дæттæ…
Цъæхцады раз комы – рувасджын бынат,
Къæдз-мæдзы фæндагыл – уистаджы цыргъ рагъ.
Сæгуытдоны комы фыццаг хатт æрцард
Уæлхохæй æрлидзæг Джыккайты мыггаг.
Себетты хъæууаты – Хадзийы хæдзар,
Цъæх Къардиуы сæрмæ – гæнахæн йæ дзуар.
Гарнайы гоппыл уыд чъырамад мæсыг.
Куыройгомы хохыл лæппын арс лæсыд.
æвзонг сычъи арæх кæвдæсыл хызти,
Сæрвæттыл къæвда дон къæртайау мызти…
æрбынат гæнахыл: сæ рад уыд дыккаг –
Дагомæй нæртон стыр Гæбуты мыггаг.
Сæ фæдыл æрлыгъди Агънаты мыггаг –
Сæ разæй куы цыди ифтыгъдæй фынк гал.
Стæй Цъамадæй ралыгъд гæнахмæ Мысост:
Дзæрæхохты сахъгуырд – æд адæг, æд цот…
Сæрд… Булæмæргъ зарыд… Цъæх-цъæхид уыд нæуу…
æнустæ ныр рацыд – куы равзæрди хъæу…
æрдхæрæны ран у нæртон Бирæгъзæнг… –
Йæ дыргъ дæр хæлар у, нæ дзы ‘фсæды лæг.
Фæрнджын уай æнусты, нæ Райгуырæн хъæу, –
æнæкæрон уарзтæй куы уарзæм мах дæу!
Дæ райгуырæн боны дын арфæ кæнæм,
Нæ сæртæ дæ номæй бæрзæндты хæссæм!
Стыр Ныхас, Газет № 9 (555) 2018 г. зæрдæвæрæны мæй (цийнæмæйæ).
