Мушьни Лашәриа ипоема-рапсодиа «Ахьтәы уасцәа» иалху амузыкатә спектакль аԥхьарбара мҩаԥысит Аԥсуа театр аҿы. Ақәыргыламҭа арежиссиор Мадина Аргәынԥҳа.
Аԥсны жәлар рпоет Мушьни Лашәриа ипоема «Ахьтәы уасцәаҿ» ари ажәытә миф шьаҭанкыла иԥсахуп: ҳаԥхьа дцәырҵуеит хара змам, имҵарсу, злахьынҵа мариам Медеиа. Аҩымҭаҿ хадара рыҭаны ицәыргоуп ажәытә ҳабацәа рхаантәи ауаа ӷәӷәақәа, урҭ рҟазшьа џьбара, ргәамч, рфырхаҵара. Апоемаҿ инарҭбаау аҭыԥ рымоуп аԥсуа жәлар аханатә аахыстәи рҳәамҭақәа — репос, рмифологиатә дунеи.
Аспектакль иалахәын Аԥсуеи Аҿартә театрқәа рактиорцәа, ашәаҳәаҩцәа, Аҳәынҭқарратә ансамбль «Шьараҭыни» Жәлар рышәаҳәареи рыкәашареи рзы ансамбль артистцәа.
Аԥсуа литература аклассикцәа иреиуоу, Аԥсны Жәлар рпоет, аиҭагаҩ, алитературатә критик, иреиҳаӡоу аҳәынҭқарратә ҳамҭа, аорден «Ахьӡ-Аԥша» I аҩаӡара занашьоу Мушьни Лашәриа ажьырныҳәа 16 рзы иазгәеиҭеит 85 шықәса ихыҵра.
Мушьни Лашәриа – Аԥсны аҭҵаарадыррақәа Ракадемиа алахәыла иаша, афилологиатә ҭҵаарадыррақәа ркандидат, Дырмит Гәлиа ихьӡ зху аԥхьахә алауреат, Шоҭа Русҭавели ихьӡ зху Аҳәынҭқарратә аԥхьахә алауреат, Антон Дельвиг ихьӡ зху аԥхьахә алауреат, Аԥсны ашәҟәыҩҩцәа Реидгыла алахәыла, СССР ашәҟәыҩҩцәа Реидгыла алахәыла, Урыстәыла ашәҟәыҩҩцәа Реидгыла алахәыла, Аԥсны ашәҟәыҩҩцәа Рассоциациа ахантәаҩы.
(sputnik.abkhazia)
