Къарча-Черкес акультури азъазари рколледж йгIайззаз абаза жвлара рыхъазла «Долгая дорога к земле предков» фильм гIадырбатI. Ауи афильм Абхаз Республика агIвгIвчва йгьи ажурналистква рсоюзква йрылу, Абхаз къральыгIва университет апрофессор Бебиа Екатерина Георгий йпхIа йахъылхтI. ЙгIазквчважвауа Абхазия ахIагIартаква рпны йаъу ПсхIвы кыт акIвпI. Ауаъа ййыз Чагва (ПсхIвы) Армида сквш 65 рымщтахь дъагIатыцIыз акыт дцарныс лмурад шлырхъйаз акIвпI апшыгIвчва зхадыргIвазауа. Афильм йгIанарбитI абазакви абхазкви ацыта акыт хъарадза рымгIва-йсра шакIвшаз, ПсхIвы абзазагIвчви лари ранйаракви райчважваракви гвалагIвалас-рата йгIарыларцIаз, Апсны апсабара, зцри Псадгьыл кIазрышвра атахъхаз атгIачва ъабзазуз ахакв шымцырахаз, ПсхIвы кыт уахьчIва абзазаща шаъу датшагьи.
Ауи амгIвайсра ахабар «Абазашта» газет йгIаквхIцIатI. Ауи йапхьаз щардагIвы хвду аквырцIатI йгьи ргвгIанаграква гIахIдрадзауата йшгIалыркIгIазла, афильм апатриот шIаква рбжьара, ауат апхъанчIвиква ртурых рхъа аладууызларныс йгьи ауагIахъаква адкIылазларныс йаквгIазшIыстуа гIвырапI. Ауи агIаншара фильмта йъахъырхыз рахIагьи къару гIанаттI. Афильм Армида лаба ПсхIвы Хзыр, йгIалыцIанакIуа ацриква рпхыцIа йазынарху агIагвалашвахраквала йырчвыпI, ауи йахъазымкIва ПсхIвы кыт ангIанша угIалагата рыцхIагIарата йгIазлысыз зымгIва гIахънатIитI. Ауи абхаз йгьи абаза уагIахъа йыртурыхгIвырата йпхъадза ауаштI.
Афильм йапшыз заджвгьи гвалымста дгьгIанымхатI. Ауи автор агвып рымгIвайсра ахъа уалагата ацIыхъвадза йшаъадзаз апшта йгIалырбахтI. Зыладз зчвгIайызгьи щардагIвыпI. Афильм ъадзацауа йацIу амакъымкви автор йщакIвкIу лбжьыла лгIахIвахри акэран йгIатанарышвуа амагIны рыцIагьи йуылаухIвауата йырчпитI.
– Сара уахьчIва Черкесск съану насып дута йспхьадзитI. «Долгая дорога к земле предков» фильм ахъысхырныс жвасквша цIуата йсгвалан. Чагва (ПсхIвы) Армида йапхъахауата санлабадыр йгьи дгIазлыцIыз аткъвым ртурых санахалыргIваза атшын йгIашIарышвта ауи ахъвыцра сгьаунамщтхтI. «Сара сантшдырха угIалагата съайыз ПсхIвы кыт зны ахIа йадамызтынгьи, сцарныс сашIыпссгIауа сбзазитI»-хIва Армида йгIасалхIвыз ажваква йызнымкIва цIолата срызхъвыцуан. Ауаса ауи амурад хIырхъйарныс тшадыгIгалпхьадза швхIаусыгIвакI гIабжьалуамца закIытагьи йыгьхIылымшузтI. Ари азын Армида лхъапщыла Чагва Фазидингьи схъапщыла Тыркба Зауыргьи йхIыцыркIын, хIынбжьагIвчва цIабыргква Малия Дона, Малия Геннадий йгьи ауи йтгIачва хIыцта сынчIва сентябрь агIан ПсхIвы ахъалра хIылшатI. Ашвъаква йгIархъыху фильм андрыхIазыруа агIан операторгьи, режиссергьи, абжьы анызцIауагьи, монтаж зчпауагьи – щардагIвы адынхалитI. Ауаса Армида лтлахц ъагIаджвыквлыз ашта йазцауа йауыру амгIвала дшымгIвайсыз гIазырбауа афильм схъазы садынхалырныс рыцIа йгIалсхтI. Йауа ухIварыквын, гIахъвыцракIгьи аласымцIауата зымгIва йшаъадзаз апшта йгIасырбатI. Афильм Чагва Армида йыл-хъыцIыз асквш 70 йадахIвуата согIата йылзысчпатI. Ауи хвы аквызцIуш апшыгIвчва швакIвпI, – йгIалылкIгIатI Бебиа Екатерина.
СахIаткI йцауа афильм аналга апшыгIвчва ауи агIаныршагIв Бебиа Екатерина Георгий йпхIа ауырата напIы йылзастI. Афильм йрызгIанаршIыхаз ахъвыцраква йгьи лахIварата йгIарыланацIаз рхIвауа щардагIвы гIачважватI.
– «ДзачIвызлакIгьи ари адуней апны щтакI гIанижьра атахъыпI» рхIвитI ауагIа. Екатерина Георгий йпхIа йгIанлыршаз адокументальна фильмгьи абазаква хIуагIахъа турых хIзырдыруа нхара дупI. Афи-льм афыр Чагва Армидагьи хIыуа дзачIвызлакIгьи йткъвым атлахц ъагIалагауа гIдырныс хIаквзыргвышхаз дгIвычIвгIвыспI. Швабыжта хIбзыразпI ауи апш хъвыцра ъахIзыгIабыршIыхаз. Бара бъабзазауа датша къральта йпхьадзазтIхIва, ауагIахъаква къральгIвына мажа гьхIызбжьам. Ауи ахъвыцра йгIахIыцIагылуа абанпараквагьи йрылахIцIара атахъыпI, – йхIватI культурала КЧР аминистр Агырба Зураб.
Афильм лахIвара ду шгIалыланацIаз лхIватI арыпхьарали культурали Абаза район администрация а-УнашвахъцIарта знапIыцIу Мартаза Зимфира. Ауи йшгIалылкIгIазла, тгIачвипхьадза апны Чагва Армида лапшта зткъвым атурых гIащаквыргылхрала рхъвыхрапшгIара нхара акIвзыршуш заджв дгIарылцIырквын, ауагIахъа шабгу ртурых узыгIащаквыргылхуаштI.
Бебиа Екатерина йгьи Чагва Армида ргIаджвыквцIара магIын ду шалу рхIвауата йгIачважватI аполитика йгьи ажвлара уыснкъвгагIвчва бергьльква – Быджь Исмель, Этлыхв Олег, Гвана Муминат, Чагва Щорс, Ашба Роберт, ШенкIауа Марина, ЧкIала Георгий.
Абаза ахIбачва р-Совет знапIыцIу Аубеков МухIадин, а-Совет йалу Меремкъвыль Джьамльадин йгьи Муратыкъва Олег афильм рыхIазыррала нхара ду акIвзыршаз Бе-биа Екатерина разыра сальамшвъа лырттI.
Къарча-Черкес йгьи Абхазия ржурналистква йадырчпалыз ангIалра апкъ йтата йапымшвтуа ацынхара хIызбжьапI, агIвыштакIгьи йыншауа рхабарква амыгIдитI. ЙалкIгIата, Бебиа Екатерина хIреспублика апны бзита дырдыритI. Ари ахъвлапынгьи ауи лфильм хвду аквырцIауата йгIачва-жватI «Черкес хэку» йгьи «Ногай давысы» уагIахъа газетква рредакторква Абидокъва Люсана йгьи Атуова Алтынай.
Екатерина Георгий йпхIа хIреспублика апны йанакIвызлакIгьи гвхътIыла йъагIал-пылуа, йалкIгIата агазетква рредакцияква рынхагIвчва пхата дъагIадрайгвауа ахъазла дшырзыразу лхIватI. ЙалкIгIата дылзырадзата тшылзыланырхатI «Абазашта» газет аредактор хъада Къвыл Фардауыс. Къарча-Черкес акультури азъазари рколледж апны Бебия Екатерина лфильм агIарбара йапщылаз ауысква зымгIва адызгалыз Къвыл Фардауыс лразыра лзыланырхатI Чагва Армидагьи.
– СырзыразпI сгIаджвыквцIара йацызкIыз заджвипхьадза, гвалагIваласра ду гIа-сылазцIауа ари афильм йапшырныс йгIадгылыз дзачIвызлакIгьи. Йсырхъйаз сгвтара магIын ду азыжвбатI. «Санпсра ПсхIвы кыт сыжвгах»-хIва саба йуасйат ажваква ансагIа йгIашIрышвта ауаъа сымцакIва йшамуаш гIасгвынгIвытI. «Псадгьыл» анырхIвауа йгIаныцIуагьи цIолата сазнархъвыцтI. АгIайыраква ртлахц адгьыл акIвпI йгIанзыршауа, йангIвахрагьи адгьыл йаладзхитI. АгIвычIвгIвысгьи данпсра адгьыл днанауахвхитI. Саба йуасйат ъасзымырхъйаз гвбжарата дута йсымата йызгатI. АпштыхI Инал дъацIу, апсыуаква уахьчIва йъагIадзазгьи ныхахIвартата йрыму ашта джьаща-хъвапI, ауи бзазара къару гIауыланацIитI. Абхазия йту хIынбжьагIвчва рцхърагIарала ПсхIвы, ауаъа мцырата йгIанхаз саба йаща МухIамад йтдзы сылаквала йызбатI. Ауи акыт хъара апны хIабадучва фыррата, хъацIарата йрылаз йашахIату ачвахъабагаква рпны хIаъан, анышвынтара йгIатызгаз адгьыл саба дъацIу Хъыжвду кыт йыгIгатI. ПсхIвы йгIатыцIта ари акыт гIанзыршаз рнышвынтараква ПсхIвы йгIатыгIгаз адгьыл анаквхIспса акIвпI сгвы антынчха. Квырмыш рзысчпитI ауи сылзыршаз абхаз нбжьагIвчва, – лхIватI Чагва Армида.
Ауи йлыцызкIыз зымгIва лыдзхъагылата сурат рхъырхтI. Жвасквшапхьадзара ана-хъыцIра ауи асурат йапшуаш абанпараква рыхъазла ацIасква, абызшва, атурых гIаща-квхарала ари афильм магIныта йаму хвы аквцIвуачвапI «Долгая дорога к земле предков» фильм апрезентация ананкIвшуз атшын ауи гIанзыршаз Бебиа Екатерина данйыз мшын. Ауи йалаз ажурналист пхата йлайхIвахIвтI, ахIрапшдзаква лырттI. Анйара лашвала йылрыпшдзатI Абаза театр актриса, ауарадхIвагIв Хвыжь Люд-милагьи.
СгIвыра салгауата йгIасшвыргвалашвахра стахъыпI Чагва Армида Хзыр йпхIа жвасквша айхIа цIуата Ставрополь край абазаква руагIахъа-культура автономия унашва шахъылцIауа. Ауи абаза йгьи абхаз чкIвыныргIа адызкIылуа дыжвлара уысн-къвгагIвпI, ауи йахъазымгIва, Ставрополь край ауацIала йапшым ауагIахъа мгIвайс-раква аргваныта дрыцынхитI, айгвари ащтаныкъвари пшдзи рмагIны ажвлара йры-лалгауата айззарата, анйарата, гвыргъьахъвта йакIвлыршауа щардадзапI. Ауи йгIалыквчважвауа афильм Ставрополь город апынгьи азгIальаматра ду азрымата йапшытI ауаъа йту абазаквагьи, Абхазия йауата Ставрополь аъачIвагIа гIацIгартаква йрыцIу астудентквагьи.
Хъвыцра щарда гIазыршIыхауа, атгIачва, аткъвым, ауагIахъа ртурых шалачпу, заманипхьадза архъвыхраква шгIаннаршауа, згвы багъьу агIвычIвгIыс абарвыраква дгIарылсырныс йырзылшауа йапхъанчIвиква рбагъьара шакIву гIазырбауа Бебиа Екатерина лфильм «Долгая дорога к земле предков» анцIра шауыразлуш йгьи атурых йшгIалахуш кьангьаш гьалам.
