Адыгэ лъэпкъым ижь-ижьыж лъандэрэ уэрэдыр къыдогъуэгурыкӏуэ. Апхуэдэщ лӏыхъужьхэр зыгъэлъапӏэ, гуауэм ехьэлӏа гъыбзэхэр. Абыхэм ӏупщӏу къыхощыж лъэпкъым и къекӏуэкӏыкӏар, хабзэу зэрихьар, и дуней еплъыкӏэу щытар.
Ӏуэрыӏуатэр куэдкӏэ сэбэп къытхуэхъуащ ди блэкӏам и пэжыпӏэр ди нобэм къыднэсынымкӏэ. Зэхэзехуэн хъуа лъэпкъым тхыдэр ихъумэн папщӏэ тхылъ къыдигъэкӏыну зы ӏэмали иӏакъым. Ауэ къэрал зэхуэмыдэхэм щыщ зауэлӏхэм, зыплъыхьакӏуэ-къэхутакӏуэхэм ятхыжамкӏэ, щхьэц налъэ зырызым ещхьу, ди тхыдэр зэхудохьэсыж. Абы къыхэкӏыу, уэрэдыжьхэр, джэгуакӏуэхэм, иужькӏэ езы лъэпкъым щыщ цӏыху къызэрыкӏуэхэм яусахэр, псом хуэмыдэу дэркӏэ щхьэпэ хъуащ. Сыту жыпӏэмэ, цӏыхухэм ялъагъу, зыхащӏэ, ягъэв псори уэрэдхэмкӏэ къаӏуэтэн ялъэкӏащ.
Ди нобэм къыднэса ӏуэрыӏуатэм ухэплъэмэ, адыгэ лъэпкъым зэхилъхьам и ныкъуэр Кавказ зауэр щекӏуэкӏа илъэсищэм зэхилъхьауэ къыщӏокӏ. Абы щхьэусыгъуэ хуэхъур адыгэм и тхыдэм къриубыдэу а илъэсищэ зауэр нэхъ гущӏэгъуншэ дыдэу, лъапсэрыхыр, хэкужьыр бгынэн натӏэр къыхуэзыхьауэ зэрыщытращ.
А пӏалъэм яуса гъыбзэхэмрэ уэрэдхэмрэ куэд мэхъу: «Щэрэлӏокъуэ Жантемыр и гъыбзэ», «Къанокъуэ Етэч и гъыбзэ», «Къуэджэбердыкъуэ Мыхьэмэт и гъыбзэ», «Азджэрий и къуэ Кушыкупщ и уэрэд», «Аслъэнджэрий и гъыбзэ», «Убых Зеишыкъуэ Къасболэт и гъыбзэ», «Дерхэ Лэхъу и гъыбзэ», «Хьэжрэтым я тхьэусыхэ», «Трамэ и къуэм и тхьэусыхэ», «Кхъуэхъужь зауэм хэтахэм я тхьэусыхэ», «Абазэхэм я зекӏуэ уэрэд», «Шурдым Пщымахуэ и уэрэд», «Дыгъужьыкъуэ Къызбэч и уэрэд», «Къэбэрдейм я жэщтеуэ», «Къэбэрдей-хьэжрэтхэм я гъыбзэ», «Лабэдэсхэм я гъыбзэ», нэгъуэщӏ куэди.
Япэ дищу жытӏэнщи, илъэсищэ зауэм и пӏалъэм къагъэщӏа уэрэдхэмрэ гъыбзэхэмрэ щыщ куэд нобэ къагъэщӏэрэщӏэжауэ аудио ӏэмалкӏэ щыӏэщи, абыхэм «ВКОНТАКТЕ» онлайн-социальнэ хъым ди газетым щиӏэ напэкӏуэцӏым
https://vk.com/cherkes_hakukchr накъыгъэм и 21-м къитлъхьауэ щывгъуэтынущ.
«ИСТАМБЫЛАКӀУЭ»
Уой си адэжь пщӏантӏэ гущэм
шыгур щызэщӏащӏэ,
Си гущӏэм къыщӏитхъыурэ
Хэкур сагъэбгынэ…
Уой уоуоуо Истамбылым дашэ мыгъуэри уой…
Уой Истамбыл гъуэгу гущэри
Уэ уи нашэкъаши,
Си къашэну дахэри
Жылэм къыдэзнауэ….
Уой уоуоуо Истамбылым дашэ мыгъуэри уоо…
Уо си шыпхъу нэхъыщӏэ гущэри
Зэрыщхьэц барини,
Ди деж зэрыбыныурэ
Сэ къыскӏэрыщӏауэ….
Уоуоуоуо, Истамбылым дашэ мыгъуэри уооой…
Адыгэжь бэракъ гущэри
Уей жьыбгъэм зэрехьэ.
Ди деж я хъыбархэри
Хэт дэ къытхуихьыну?..
Уоуоуо, Истамбылым дашэ мыгъуэри уооой….
Уоуоуо, Истамбылым дашэ мыгъуэри уооой….
Истамбылым дашэ мыгъуэри уооой…
Истамбылым дашэ мыгъуэри уооой…
Истамбылым дашэ мыгъуэри уоооой…
«Къэбэрдей-хьэжрэтхэм я гъыбзэ» (хэхэсхэм зэрыжаӏэр)
Ныжэбэрей жэщыми рауи,
Вагъуэхэр собжыри ралахь.
Щхьэцыпэм и бжыгъэурэ сэр мыгъуэ дыдэ,
Ей, Дуней, дэ цӏыху тфӏэкӏуэда мыгъуэ ралахь.
Уэр ди хьэжрэт пщыжьхэри рауи,
Я псэ емыблэж мыгъуэ ралахь.
Уэр ди щӏалэ бланэхэр сэр мыгъуэ дыдэ,
Ей, Дуней, хьэдэу къытхуашэж мыгъуэ ралахь.
Ныжэбэрей жэщыми рауи,
Топыжьхэр мэгъуагъуэ мыгъуэ ралахь.
Дызэщӏэугъуеежуру сэр мыгъуэ дыдэ,
Ей, Дуней, Хэкужьым драху мыгъуэ ралахь.
Жылэр къызэрыдэджэри рауи,
Уэр «Истамбылакӏуэ» мыгъуэ ралахь.
Дызыхуэкӏуэр дымыщӏэурэ сэр мыгъуэ дыдэ,
Ей, Дуней, дэ гъуэгу дытеува мыгъуэ ралахь.
Уэр мы кхъухь фӏыцӏэжьхэри рауи,
Жьыбгъэм къызэредзэ мыгъуэ ралахь.
Уэр зэхэзедзэнурэ сэр мыгъуэ дыдэ,
Ей, Дуней, утыку дыкъина мыгъуэ ралахь.
Дэ ди хьэблэ цӏыкӏухэри рауи,
Къызэщӏокӏие мыгъуэ ралахь.
Дэ ди кӏий макъыри сэр мыгъуэ дыдэ,
Ей, Дуней, зыми зэхимых мыгъуэ ралахь.
Уэр мы кхъухь фӏыцӏэжьхэри рауи,
Хы ӏуфэм къокӏуалӏэ мыгъуэ ралахь.
Уэр екӏуэлӏапӏэншэуэ сэр мыгъуэ дыдэ,
Ей, Дуней, губгъуэм дыкъина мыгъуэ ралахь.
