Истамбыл Кавказ Щэнхабзэ Хасэм и нэӏэ щӏэту и лэжьыгъэр езыгъэкӏуэкӏ, Истамбыл «Мэзбжэн» Щӏыуэпс Спорт Клубым и «Мэзбжэн Драгон бот Командэр» жэпуэгъуэ мазэм и 12-м, тхьэмахуэ махуэм, екΙуэкӏа Газиантеп – Румкалэ Псы Спорт Фестивалым Драгон бот Зэпеуэхэм хэтащ. Мазитӏрэ ныкъуэрэ фӏэкӏа зызымыгъэса гупыр финал ныкъуэм нэсащ, гуп 29-рэ зыхэта зэпеуэхэм щыцӏэрыӏуэ командэ куэдым япэ ищащ.
Зэпеуэхэр иуха нэужькӏэ, Драгон бот Командэм и гъэсакӏуэ Эрай Деликлиташ «Жьынэпс» газетым щыщ Элиф Токгюз мы псалъэхэр къыжриӏащ: Мазитӏрэ ныкъуэрэ нэхъ утемылэжьауэ, мы командэхэм ублэкӏыу финал ныкъуэм унэсыфыныр, пэж дыдэу, ехъулӏэныгъэшхуэщ. Япэрей лъэхъэнэхэм кубокхэмрэ медалхэмрэ къэхьыным егъэлеяуэ уелΙэлΙэн хуейкъым… Сыту жыпӏэмэ, дызытепсэлъыхьхэр зэхьэзэхуэ утыкуми щытлъагъуну, лъэбакъуэ-лъэбакъуэкӏэ нэхъыфӏ дыхъунымкӏэ а гукъыдэжыр зыхуэтщӏыжыныр зэхьэзэхуэм, зэман кӏыхьым къыхэхъуэ ӏуэхугъуэхэщ.
Дыубыда щӏыпӏэр псоми зэралъагъур «телъыджэущ». Къищынэмыщӏауэ, пшыхьым и къызэгъэпэщакӏуэхэм зэныбжьэгъу псалъэмакъым къыщаӏуэтащ командэм зэӏущӏэр нэхъ нэху, нэхъ зэпеуэныгъэфӏ, нэхъ гъэщӏэгъуэн ищӏауэ зэрыщытыр. Абыхэм «Мэзбжэн» командэр илъэс къакӏуэми зэпеуэхэм ӏэмал имыӏэу хэтын хуейуэ къалъытащ.
Командэм и цӀэкӀэ къэпсэлъа Алтынай Ширин апхуэдэуи къыхигъэщащ щӀыуэпс спорт лӏэужьыгъуэхэм я ӏэнатӏэмкӏэ «Мэзбжэным» иригъэжьа ухуэкӏэщӏэм щэнхабзэ нэрылъагъуныгъэм хэлъхьэныгъэшхуэ зэрищӏыр икӏи мыпхуэдэу къыпищащ:
«Истамбыл Кавказ Щэнхабзэ Хасэм» и жьауэм щӏэту треккинг ӏуэхухэмкӏэ къахэщ «Мезбжен» Истамбыл щӏыуэпс лъэпкъ спорт клубми мы гъэм и лэжьыгъэм и лъэныкъуэхэм хэпщӏыкӏыу зыщиубгъуащ, зэхэухуэныкӏэщӏэ зэрызэригъэпэщам и фӏыгъэкӏэ. Иджы ар треккинг къудейкъым; кемпинг, псы щӏагъым щесыныгъэ, драгонбот, лъакъуэрыгъажэ спортым хуэдэ ӏэнатӏэ зэмылӏэужьыгъуэхэмкӏэ зэӏущӏэхэр къызэзыгъэпэщ «Мэзбжэн» командэр щӏыуэпсым щекӏуэкӏ спортым и лъэныкъуэкӏэ ӏэщӏагъэ куэд зыбгъэдэлъ зэгухьэныгъэ хъуным хуэкӏуэ гъуэгум тетщ.
А зэфӏэкӏхэм я фӏыгъэкӏэ «Мэзбжэн» гупым щӏыуэпсым и деж спортымкӏэ игъуэта ехъулӏэныгъэхэмкӏэ дгъэлъэгъуащ дунейм ухузэӏухауэ ущыткӏэрэ ди щэнхабзэмрэ ди цӏыхугъэмрэ жылагъуэ утыкум нэхъыфӏу къыщыхэдгъэщын зэрытхузэфӏэкӏынур. Спорт зэхьэзэхуэхэм, щӏыуэпсыр хъумэным теухуа ӏуэхухэм хэтурэ, Кавказ хэхэсыр цӏыхубэ утыкум къыщыгъэлъэгъуэным, гурыӏуэгъуэ щыщӏынымкӏэ ӏуэху дахэхэр зэфӏэзыгъэкӏ ди ныбжьэгъухэм дохъуэхъури, адэкӏи къамыгъэувыӏэну «Пыфщэ, Мэзбжэн!» яжыдоӏэ.
«Мэзбжэн Драгон бот Командэр» жэпуэгъуэм и 25-м Сакаря къалъэм щекӏуэкӏа «Драгон бот фестивалым» хэтащ. Фестивалым хэта гупым Республикэ Кубокым япэ увыпӏэр, Фун категорием и япэ увыпӏэр, бзылъхугъэхэми Республикэ Кубокым ещанэ увыпӏэр къыщихьащ.
