Зы нарт лIыхъужь: Абазэ Ибрахьим

0
45

1966-1968-рэ илъэсхэм Анкара сыщеджэзэ журналэу «кавказ-ыр» къыдэзгъэкIырэ адыгэ интеллигентэу Цушъхьэ Иззет нэIуасэ сыфэхъугъагъ. А уахътэм журнал къыдэбгъэкIыным къиныгъуабэ пылъыгъ. Абазэ Ибрахьимыгъ Цушъхьэ Иззэты анахь дэIэпыIэгъушIоу иIагъэр. А илъэсхэм апэу адыгэ хэкум ныдэлъфыбзэкIэ къыдэкIырэ тхылъхэр тыркуемкIэ къытIэкIэрыхьэ хъугъагъэ. Сэри адыгабзэ тхылъхэм сяджэным сыкIэхъопсыщтыгъ. А лъэхъанэм зэрэ тыркуеу адыгабзэкIэ тхакIэ еджакIэ зышIэщтыгъэ нэбгырэ зырызмэ зыкIэ ащыщыгъ Абазэ Ибрахьимэ. Сэри ныдэлъфыбзэмкIэ тхэкIэ еджакIэ сэзгъэшIэгъагъэр Абазэ Ибрахьим. А.

Ибрахьимэдэхэр Анкарам улуджанлар районым щыпсэущтыгъэх. ТхакIэ еджакIэрэ адыгэ алфавитымрэ зэзгъэшIэным пае пчъагъэрэ Ибрахьимэдэхэм яунэ сыщыIэнэу хъугъагъэ. Абазэ Ибрахьимэ цIыф губзыгъэу, чанэу, сэмэркъэу дахэ хэлъэу щытыгъ. ТыркуемкIэ адыгэ лъэпкъ Iофыгъор апэу къызгурыIуагъэмэ ащыщыгъ. Адыгэ цIыфмэ лъэпкъ зэхашIэ яIэ хъуным гурэ псэрэкIэ дэлэжьэщтыгъ.

А илъэситIум къынэужь сэ Анкарэм сыдэкIыжьынэу хъугъагъэ. Абазэ Ибрахьимэрэ илъэсыбэрэ тызэIукIэжьыгъэп. 1994-рэ илъэсым Мыекъуапэ сыкъэкощыжыгъагъ. Сыдфэдэми «дунаер цIыкIу» зэраIоу Абазэ Ибрахьимэрэ джыри зэу тигъогупэхэр зэнэсыжьынэу хъугъэх. СиIофшIэгъоу Цей Азэ Ибрахьимэ ыкъо Беркъукъ шъхьагъусэ фэхъугъагъ. Мы хъярым Ибрахьимэрэ сэрырэ тиныбджэгъуныгъэр дгъэпытэн лъыдгъэкIотэн амал къыздихьыгъагъ. Анкара сызэкIом пчъагъэрэ Ибрахьимэ иунэ сищыхьэкIагъ. Ежьыри Налъщыкъ къызэкощыжьым нахь тызэIукIэ тызэрэлъэгъу хъугъагъэ.

Абазэ Ибрахьимэ иныдэлъфыбзэр, илъэпкъ культурэр инэу шIузылъэгъурэ цIыфыгъ. Лъэпкъым ыбзэрэ икультурэрэ къигъэнэжьыным, къыухъумэным пае зэрэфэлъэкIэу, зышъхьэмысыжьэу Iоф дишIагъ. Тыркубзэ-Адыгабзэ гущыIалъэ зэхигъэуцуагъ ыкIи тхылъэу къыдигъэкIыгъ. Адыгэщхэм, адыгацIэхэм, адыгэ щэн хабзэхэм яхьылIагъэу тхылъхэр къыдигъэкIыгъэх. Итхылъмэ ащыщхэр къысфыригъэхьагъэу Мыекъуапэ дэт тхылъ тучанхэм афэсыугощыгъагъэх. Идунай ымыхъожьыгъагъэмэ джыри къыдигъэкIын тхылъхэр, ышIэн Iофхэр иIагъэх.

Идунай ыхъожьынымкIэ зымафэ нэхъ къэмынагъэу къэсымэджагъэу Ибрахьимэ дэжь врач къащэгъагъ ипсэуныгъэ ирагъэуплъэкIунэу. «Врачым ешIу псынкIэу сигъэхъужьынэу, неуш Iофыбэ сиI згъэцэкIэн фаеу»- ыIогъагъэу инысэ Азэ къеIотэжьы.

Абазэ Ибрахьимэ ицIыфышIугъэ, исэмэркъэу дахэхэр, илъэпкъ фэшI емызэщэу зэрэлэжьэщтыгъэр тщыгъупщэжьыщтэп. ТыщыIэфэ шIукIэ дахэкIэ тыгу илъыщт.

CEVAP VER

Please enter your comment!
Please enter your name here