Куэд лъандэрэ дызыщIэхъуэпса, дызыпэплъа фIыгъуэ къыдэхъулIащ: дунейм къытехьащ еджапIэм зи пажэгъуэу щIэс цIыкIухэм я гъащIэм теухуа спектакль. ДимыIа, дызыхуэныкъуэ къыдэхъулIащи, хуабжьу дыщогуфIыкI.
«Адыгэ дуней» лъэпкъ фондым зыхуигъэувыжа пщэрылъхэм щыщщ ныбжьыщIэхэр утыкум адыгэбзэкIэ щыгъэпсэлъэныр. АбыкIэ Iэмалу щыIэм я нэхъыфIыр театрырами, мыбыхэм я ныбжьым екIуалIэ пьесэ адыгэбзэкIэ тхауэ диIэтэкъым. Иджыблагъэщ апхуэдэ къыщытехьар дунейм.
Ар и фIыгъэщ Къаныкъуэ Заринэ. «МафIэгу» зыфIища пьесэм абы щыдегъэлъагъу гъащIэм хыхьэну зызыгъэхьэзыр щIалэ, хъыджэбзхэм я гупсысэкIэр, лъапIэныгъэу къалъытэр, яIэ зэхущытыкIэр, дунейм зэрытеплъэ нэр.
Апхуэдэ зэфIэкI япэу яIащ Дэбагъуэ Бэрэсбий и цIэр зэрихьэу Шэджэм къалэ дэт 1-нэ курыт еджапIэм и 10-11-нэ классхэм щIэс еджакIуэхэм. Егугъуу загъэхьэзыращ, пьесэр гунэс ящыхъуауэ щыджэгуащ.
ФIыщIэ хуэфащэщ еджакIуэ цIыкIухэр апхуэдэ пьесэ купщIафIэм пэлъэщыным хуэзыгъэхьэзыра, артист IэщIагъэм и щэхухэм щигъэгъуазэурэ Iуэхум тезыгъэгушхуа, спектаклым и режиссёр Къанкъул Ислъам. Ар Максим Горькэм и цIэкIэ щыIэ Урыс драмтетатрым и артистщ.
Утыкум спектаклыр щагъэлъэгъуэфын папщIэ Фондым ар зыхуэныкъуэхэмкIэ къызэригъэпэщащ.
Зыхуатха ныбжьым итхэм гурэ псэкIэ къащта пьесэр, дауи, авторым къехъулIащ.
