Ан-абачва рклуб йалакву айззахын апхьартаква рпны арыпхьаща ауыс йаквчважватı

0
109

АААК йаланакıуа Ан-абачва рклуб коронавирус згıва ъагıаджвыквлыз йгıалцıла заман ауыра йгьнымхузтı, ужвы анхара джвыквнацıахтı. «Агıамта шıыц» йапхъахуз анйара апщаша, июль а 29 атшын агваны йакıвшатı, йаргьи апхьартаква рпны арыпхьаща йазынархан. Ауаъа дгıачважватı Апсны апны арыпхьара шıыцра алажьрала Аквта аунашвачпагıв Барчан Инна. 

Ан-абачва рклуб анхара йшалакıу даквчважвауата Барчан Инна йгıалылкıгıатı щарда цıуата анчви абачви рыжвлара азкıкıра шатахъыз, ауи йаланакıквауа «йхътıыта ргвгıанаграква рхıва, ргвакъвпраква агıвырша» йауашын. 

Анйара ахъа агıачважвагıв айшыста азцıгıара хъадаква гıалыргылтı: арыпхьара аргıапсща псах йшпауаш, ауи рыцıа йнардзата, асабиква уахьчıва йгıартахъхуш адырраква рнатуата йшпаучпуш? 

«Йхъадата хıыззхъвыцуа ауыс хıачвымшвауата, айрышта ацıыхъва хıтагылра шатахъу акıвпı. Арыпхьара апны ауыжвгıанчıви амальква, ашвапхаква апхъапхъа йууырдырта, уацıыхъван абзазара йалажьра атахъыпı», – йылпхьадзитı Барчан. 

Апсны апны арыпхьара шıыцра алажьрала Аквта аунашвачпагıв лынхарта даквчважватı. Ауи йгıалылкıгıатı аквта анхагıвчва адуней апны йгıадрысабапуа йапшым арыпхьара ашвапхаква шдырхъвыхуа, ажвапıта – финн, эстон, сингапур арыпхьащаква. 

«Хıара араъа, Апсны апны, гıальаматхушызшва йыгıбауа зджьакı гıалхıххьатı. Сингапур йауу аъачıвагıагıвчва араъа йгıагıагтı. Швабыж хıайгвгъитı арыпхьарала [Апсны] а-Министерства арыпхьаща амаль шıыцква абзазара йалагıжьырныс йгıахıцхърагıушта», – лхıватı ауи. 

Барчан Инна Сингапур апны арыпхьара аргıапсща шıыцта йшджвыквырцıаз, зхъа йахвиту къральыгıвата йъадзану асквш 45 руацıа «дахıвра ду йшазынадзаз, адуней йъкıвызлакıгьи йзынхуш, йызбзазуш гıвычıвгıвыс, къральыгıв дшщаквдыргылуа» лхıватı. Ауаъа йгıадрысабапуа амальква йрыщатапı йапшым арыпхьащаква – асабиква академия дырра йаццауата ахъаз йрымаджьащахъвахуш, хъвмаррата йырзалуаш аматериалгьи рытра. Гватра ду азалхпı ауат рпны азаджв азаджв дъайыздзыргıвуа, йацацхърагıауа, йалакıу, абайгвыгıвра зызбжьу агвып (акласс) щаквыргылра. 

Анйара амщтахь агıачважвагıв йгıалылкıгıатı Ан-абачва рклуб йалакву ауыс джьгарта йшалачважвуз, азцıгıара щарда шлыртуаз, йламакıуата дара ргвгıанаграквагьи шырхıвуз. 

«Са йшызбауала, ан-абачва ашıыцраква йырзыхıазырпı, йыртахъыпı. Анчви абачви йырбитı асабиква [ужвы] дара йшыртахъу апшта рдырраква штшауацıырымхуа. Сара йсыласхıвитı ан-абачва апхьарта шıыцква гıаныршара, архъвыхра шıыцква адгалра ауысква рпны йшхıыцыркıуа», – лхъвыцща хıыцагıвылшатı Барчан Инна. 

Хгıвысабичва йрану йбергьльу апсуа журналист Джьапıуа Арда арыпхьара апны апсахраква абзазара йгıанаргылыз уыста йылпхьадзитı. 

«Ан-абачва – зымгıва ракıвмызтынгьи, сара арыпхьара ауысла сзайчважваквауа гıасахвпıта – йалыргата йгıахıгвынгıвитı [арыпхьара] аргıапсща щарда цıуата йпсахра шатахъу. Абзазара гьгылам, адуней апхъала йнаскıьитı, къраль щарда арыпхьара амагıны тшазырдыруата гватра ду азалырхитı, ахча щарда аларцıитı. Йагıапı хıаргьи хıсабиква рарыпхьара хıуысква рапхъа йхıыргылырныс», – лхıвитı ажурналист. 

Ауи йгıалылкıгıатı Ан-абачва рклуб анйара апны хъвыцра джьащахъва щарда шгıархıваз, Апсны апны арыпхьара шıыцра алажьрала Аквта анхарагьи магıын ду шаму. 

«Сара цıабыргыта йыздыритı ан-абачва рыжвлара йауата щардагıвы йгвыргъьачıвауа арыпхьара аргıапсра псахрала йагъьу амальква гıалазгауа ауи Аквта йа ари ауыс апхъа йгылуаш датша гıаджвыквцıагıвчва гвыпкı штшрыдыркıылуаш», – кьангьаш гьазгıалгуам Джьапıуа Арда. 

Пачулиа Оксана амаль лымата АААК Ан-абачва рклуб апны анйаракıгьи гьагıвылщтуам. Ага лсабиква ужвыгьи апхьарта йымцузтынгьи ауат шалрыпхьуш уахьчıва дазхъвыцитı. Ауи йшылбауала, ужвы йщаквгылыз арыпхьара ргıапсра упсахырныс гьмайразлушым. 

«Сара багъьата йгьсзыхıвушым хıапхьартаква ашıыцраква йрыдгылта зынла йгıадрысабапуа йалагушта. Са сшапшуала, апхъапхъа курсквакı, лагерквакı адгал йауашын – ан-абачва рсабиква ауаъа йдырцата, ажва ахъазла, сингапур арыпхьаща шаъу йапшырныс, ауи шынхауа гıаргвынгıвырныс ахъазла», – лхıватı Пачулиа Оксана. 

Анйара шакıвшаз даквчважвауата АААК Ан-абачва рклуб аунашвачпагıв Квициниа Кıама ауи «йалачпата, ауыс йазынархата» йшцаз гıалылкıгıатı. 

«Ахъвыцщаква гьапшымызтı. Йаъан йщаквгылхьаз арыпхьаща йазгылазгьи, йаъан арыпхьара уахьчıва тшауацıнамхуата, ауи йшаъу йгıаныжьта амаль амамкıва, арыпхьара апны адгылща шıыцква уырзыпшгıара атахъыта йызрыбагъьузгьи», – лхıватı Квициниа. 

Лара лхъатала ауи йшылпхьадзауала Апсны апны арыпхьара кризис йштагылу «ларбагıвыгадъагьи йубитı». Аклуб аунашвачпагıв йшылхıвауала, карантин йгıалцıла асабиква таразта йъадзадымрыпхьуз асквшыкıи бжакıи руацıа арыпхьара апны йаъу, апхъала уыла йгıацıамшвуз бжара щарда тшгıахъыртıытı. 

Ан-абачва рклуб Адуней апсуа-абаза конгресс а-Дискуссия клуб апны йазалху проекта асквш 2019 ноябрь агıан анхара джвыквнацıатı. Аклуб гıари дызму дзачıвызлакıгьи далал йауитı. Адгалагıвчва йшырхıвуала, ауи ахъазла йатахъу закıзаджвыкıпı – «азыгıальаматри гвышхвари». Аклуб апны апсихологква, апедиатрква, асабиква бжьарала йапшым аъачıвагıагıвчва йрынйалитı. (abaza.org) 

CEVAP VER

Please enter your comment!
Please enter your name here