Лъэпкъ зыкIыныгъэм и Мафэ ихэгъэунэфыкIын фэгъэхьыгъэ мэфэкI Iофтхьэбзэ шъхьаIэхэм ащыщ Урысыем щыпсэурэ лъэпкъхэм якультурэ ыкIи яискусствэ ифестивалэу къалэу Ростов-на-Дону щызэхащэщтыр. Ар шэкIогъум и 4-м рагъэкIокIыщт, Къыблэ федеральнэ шъолъырым итворческэ куп анахь дэгъухэм зыкъыщагъэлъэгъощт.
МэфэкI концертым хэлэжьэщтых Адыгэ Республикэм и Къэралыгъо ансамблэу «Ислъамыер», Къырым филармонием иансамблэу «Джазрандеву», купэу «Хор Турецкого» зыфиIохэрэр, Къалмыкъ Республикэм и Къэралыгъо хорэу А.Цебековым ыцIэ зыхьырэр, Астрахань ыкIи Волгоград якъэралыгъо ансамблэхэр, нэмыкIхэри.
ШэкIогъум и 4-м мафэм сыхьатыр 12-м къыщыублагъэу телеканалэу «Дон-24-м» ыкIи ИнтернетымкIэ (ссылкэу) зыфиIорэм концертыр къагъэлъэгъощт. Джащ фэдэу искусствэм иIофышIэ цIэрыIохэр цIыфхэм къафэгушIощтых. Ахэм ащыщых Никас Сафроновыр, Юрий Башмет, Михаил Турецкэр.
(Адыгэ макъ)
