Псэ гуапэм и Iэужьхэр

0
165

«Дунейм тет хъугъуэфIыгъуэ псом щыщу уи дежкIэ сытыр нэхъ лъапIэ, Хьэсэн?» – къызэупщIащ лIыжь жьакIэху мыпсалъэрейр. Нобэ махуэ етхуанэ хъуауэ зы пэш дызэдыщIэлъу сымаджэщым дыщыIэщи, иджыпстут нэхъ хэкъузауэ дадэр къыщыпсэлъар. Жауап стыжыну си псалъэхэм сыхэщыпыхьыхукIэ, лIыжь жьакIэхум и упщIэм и жэуапыр езым иритыжащ.  

– Хэкурщ, Хьэсэн, Хэкурщ! Псом хуэмыдэжу а зыхэщIэныгъэр нэхъ куу мэхъур Хэкум ущыпэIэщIэм деж, Хьэсэн! Апхуэдэм дежи мыхьэнэшхуэ иIэщ зы кхъужьей къудамэми! Сыту куэдрэ щIэлъэIуат си анэшхуэ тхьэмыщкIэр Хэкум щагъэкIа кхъужьей жыгыжьым щыщ къудамэм. Ауэ а къудамэми къыпэщылъар хэхэсыр зыIуува IэнатIэрт… 

Къудамэр кIыну хуейт и къуэпс идзыжрэ и лъабжьэр быдэу щIым хэту. И Хэкум и акъужь щабэр къыщIихурэ къудамэбэ жыгыр зыхэт и лъахэщIым и IэфIагъ псори зыхищIэу. Езы кхъужьейри хуейтэкъым и зы кхъудамэ игъэчэмыну. Ауэ Iэмалыншагъэти, итащ къудамэр.  

Кхъужьеижьыр есатэкъым «хьэуэ» псалъэм, ар пхутекIынутэкъым и щIым къыщекIуэкI хабзэм. Зыгуэрым хуэщхьэпэну ищIэу, ар икIуэтынутэкъым. Сытыт ар зэрымыхъур: «жьэуапIэт», «гъуэмылэт», «щIымахуэ шхынт»… Иджы мис «фэеплъу» итащ зы къудамэ. Итащ и къудамэм къыпэщылъыр ищIэ пэтми. Илъэсищэм щIигъур зи ныбжь кхъужьейм ищIэрт лъабжьэншэ къудамэм куэд зэримыкIуныр. Ар хуэныкъуэнут IэфIагъ псори къезыту щыта щIым, лъахэ акъужьым, къызэринэкIыну адрей къудамэхэм. 

ХамэщIым нахьэса нэужькIи, зыщыщым къыгуахами, ар лъыхъуэнут зэрыпсэун хэкIыпIэ. Хамэпсыр зыщIишэнут псэм фIэмыфIми мыхуалэу, мыгъужу зиIыгъын папщIэ, хамэ акъужьым ирибэуэнут, къехьэлъэкIми. Кхъужьей къудамэм зэрыхъукIэрэ зитынутэкъым. Лъабжьэ зимыIэж къэкIыгъэм гъащIэшхуэ зэримыIэр къыгурыIуэ пэтми, езы къудамэр иджыпстукIэ зэгупсысыр пщэрылъ къыщащIа Iуэхур екIуу зэрызэфIихынырт. Апхуэдэ гъэсэныгъэт хъужьеижь жыгым абы къритар. «Фэеплъу» къахьа къудамэм зыми зыкъригъэщIэнутэкъым гукъеуэ гуэри иIэу, зыгуэри къехьэлъэкIыу. А псори абы IэщIыб ирегъэщIыфыр езы къудамэм къыхуэныкъуэ, къыхуэпабгъэ зэрыщыIэм. Абы къыпежьари итащ езы къудамэр иджыпсту зэрыт щытыкIэм хуэдабзэ.  

Кхъужьей къудамэм къыпежьат Хэкумэ зыщыуа сыт хуэдэ Iуэхури зыфIэIэфI нэ дахитI, зэрыхъукIэрэ зыкъригъэлIэлIэну Iэ щабитI, нэм, псэм хуихьащ, игъэлъэпIащ. И гъащIэр кIыхь зрищIыными пылъащ. Ауэ Кхъужьейжь къыщригъажьэм къудамэм къызэрыжриIащи, лIэными лIыгъэ хэлъщ. Псэр дэпхуэдизу мыIэфIми, ажэлми щышынэжыртэкъым къудамэр. 

Къахьэсащ хамэщIым «фэеплъ» къудамэр, зы тхьэмпэ мычэмауэ, зы къудамэ цIыкIу гуэмызауэ.Тобэ, тобэ сыту нэпс шыугъэ куэд къытеткIуа а махуэм кхъужьей къудамэм! Сыту IэплIэ хуабэ куэд кърашэкIа абы, яIэпыхуу къутэн хьэкъущыкъу гуэрым хуэдэу къыхуэсакъыпэу! 

Арати, «фэеплъ» къудамэр дадзащ хамэщIым щыкI мыIэрысей жыг цIыкIум. Къудамэм зэкIэ ищIэркъым зыщыщыр, мыIэрысей лъабжьэм езы кхъужьей къудамэри егъашхэ. ЛIэныгъэм зыхуигъэхьэзырами къелащ, лъабжьэщIэ къратащ. ХамэщIыр къехьэлъэкIми, сыт ищIэн, Iууващ апхуэдэ IэнатIэ. И тхьэмпи, и къудами гъусэ хуащIам зыкIи емыщхьми кхъужьей къудамэм зыдрегъэкIу мыIэрысейм. Жьышхуэ къыкъуэуар къудамэхэм къыщеIунщIым дежи кхъужьей къудамэр мыIэрысейм хуосакъ. НэгъуэщIу ар щытыфынукъым, аращ Кхъужьеижь зэригъэсар. 

Махуэ щIагъуэ дэкIкъым кхъужьей къудамэм цIыху къыхуэмыкIуэу, уэршэрэгъу имыIэу. Уеблэмэ, и лъахэм щитым щыгъуэ зэхихыу щыта макъамэ нэгъунэкIэ къыдэгуашэ цIыху къыщыхуэкIуэ щыIэщ. Апхуэдэм дежи кхъужьей къудамэм къаруущIэ къыхохьэ. Езы къудамэм къыхуэкIуам дэрэжэгъуэ егъуэт. Мис апхуэдэу хамэщIым щызэрыIыгъщ зи Хэкур зыбгына къэкIыгъэмрэ цIыхумрэ!.. 

ЛIыжь жьакIэхум къыжиIэжар зэпщIыхьа пщIыхьэпIэми, къэхъуа дыдэми къызгурыIуакъым, ауэ гупсысэшхуэ сызыхишам сыкъыхэмыкIыжыфурэ жей IэфIым сыхилъэфащ…  

  

Тхыгъэр зейр: Мэщкlуащэ Залинэ Чэлимат ипхъу, Дохъушыкъуей къуажэ дэт 2-нэ курыт еджапlэ. 

ЕгъэджакIуэр: Борыкъуей Жаннэ Хьэсбий ипхъу. 

CEVAP VER

Please enter your comment!
Please enter your name here