«Юькъачу хьуьнна кIеззиг юьстахо болчу попан луьстачу гаьннаша ларвора Алхаст маьлхан йовхачу зIаьнарех. Шен IиндагIе дIатарвелла кIант веза-воккха хьаша лерина болу и нохчийн поп, шега тахана кхаьчначу хIусамден даржах дозаллийца боккхабуьйш хеталора. Гаьннийн буьхьигаш Алхастана гуттар а тIекховдийна, ша беха хIара Iаламан хIусам ницкъ ма-кхоччу цунна аьхна йина, кIеззиг йолчу гIовгIанах а кIантана новкъарло хиларна кхоьруш, атталла, махе шен гIа а ца ластадойтуш, тешаме гIарол хилла лаьттара поп. ХIинццалц, Дела денна вовшашца мукъаман къовсам латтош, хаддаза иллеш кхайкхош хуьлу зарзаррий, къоркхокхий а бацара тахана хезаш. Дехьо-о кхуьучу кхуран гIодах а летта, вотанча шех хилла хьийзаш хенакIур-м яра, хIара хаза тийналла тийна хила ца юьтуш, йилбазмохье дуьйлу шен «тIах-тохь» хьун юьззина декош йоллуш. Амма, да висарг шен яI-кха, ма совнаха а яцар-кха хIоккхехь цуьнан зIакаран и башха гIовгIа. Ма шен меттахь а, шен хеннахь а яр-кха и. Ма говза дузуш дерзадора-кха цо кху Iаламан исбаьхьа сурт.
…Кхано-о, малх шен гуо берзорехьа таьIча, малхбузе а, кханалера йоькхана билгалъеш, кIеззиг цIияла йоьлча, ха хоьрцуш цкъа-шозза дIаса а керчина, бIаьргаш дIадиллира Алхаст. Цу сахьта цуьнга терра самаделира попан хIора га а, гIа а. Олхазарийн тайп-тайпана аьзнаш арахьаьлхира царна юкъара. ГIодехь сетташ санна а хоьтуьйтуш, халла хаалуш техкира поп ша а. Чухчарин гIовгIа а чIагIъелира, цуьнан когашкахь чуоьгучу хиэ хIиттийна кегийра куьркаш а яра шайн аз хазош.
И схьахезаш мел йолу гIовгIа… хенакIуран «тIах-тохь» а, къоркхокханан-зарзаран илли-эшар а, гаьннашна, гIашна юкъахь даьлла шабар-шибар а, чухчарино гIаттийна дур а, куьркаша до «булкъ» а… и еригге а гIовгIа Iаламо шега деш къамел лерина, оцу къамелах мелла а кхеташ ша а карийна, церг-кхела гучуяккха лерича санна, велакъежира Алхаст. ТIаккха, парггIат хьала а гIаьттина, айми йисте а хилла, юьхь-куьг дилира.
Алхаст цуьрриг а хийрачу меттехь вацара. Я къехка а, я, цхьа нехан нахана юкъахь санна, ийзавала а, я, стунцахошна хьалха санна, бехк лаьцна хила а ца везара кхузахь. Алхаст шен цIахь, уггаре а баьрчерчу баьрчехь вара. Цундела цуьнан синна маршо а, йоккха паргIато а яра кхузахь.»
