Ныфсы Лæг
Мæ уарзон Ир, æрцæгъд хъæрæй фæндыр,
Ды та, Хуыцау, цæрæнбон ратт нæ Ирæн.
Куыд уæм æрмхæст сæрибары фæндыл, –
Нæ рухс фидæнмæ нал баззади бирæ.
Тырнæм æмвæндæй иумæ размæ мах, –
Нæ буц хистæр нæ рухс фидæнмæ хоны.
Хæссы нæ рог Сæрибармæ нæ къах, –
Нæ рæстаг тох æппæт дуне дæр зоны.
Фыдуавæры нæ сæр ысси нæ мæт,
Уæддæр æмвæндæй радтам дзырд нæхицæн:
Нæ фыдгул нæм йæ марæн кард хæссæд,
Уæддæр нын нæй Цæгат Ирæй фæхицæн.
Уæлахиз уæд нæ сахъ цæргæс, нæ ныфс,
Дыккаг хатт нæм уый фарны къах æрхæссæд.
Нæ тохы хъæр, æппæт дунетæм хъуыс,
Йæ фæрцы ныл сæрибар хур ыскæсæд!
