ТОРЕАДОР
Мæ разы – тæлфаг гал. Къæдзæхау – йæ ас,
Кæсы мæм йæ цæстыты тигъæй.
Мæ къухы – сырхзæлдаг, æфтауы йыл тас,
Йæ сæр ма бæласау ныууигъы.
Уый афтæ рæсугъд у!.. Нæ йæм сисин кард!..
Мыййаг, кæд мæхийау у иунæг…
Цы кæнон? Йы сыты цыргътыл мæ цард
Мæлæтимæ бацыди зиуы!
Нæ хъысмæтмæ уыг дæр нæ кæны хæлæг…
Кæйдæр сæфт ма чи дары мурмæ!..
Нæ иуы рæдыд, – æмæ хиуарзон лæг
Фырæмдзæгъдæй хаудзæни хурмæ.
Фод афтæ… Мæнæн кæд мæ амонд фæдæ? –
Нæ иу дæр йæ цæссыг нæ сæрфы:
Дыууæ удæй абон нæ иуæн уæддæр
Æнустæм йæ хъизæмар сæфы…
