Ягупсэхэр алъэгъунхэ амал яlагъ

0
61

Мы илъэсым ихъугъэ-шlагъэхэм ащыщ Адыгеим икlыгъэ дзэкlолlхэу Украинэм щыкlорэ хэушъхьафыкlыгъэ дзэ операцием хэлажьэхэрэм апае УФ-м зыкъэухъумэжьынымкlэ и Министерствэ телелъэмыджэу зэхищагъэр. Ащ ишlуагъэкlэ тидзэкъулыкъушlэхэм яlахьыл-гупсэхэр алъэгъунхэ, адэгущыlэнхэ амал яlагъ. Ащ фэдэ шlыкlэр Адыгеим апэрэу щагъэфедагъ.

lофтхьабзэм хэлэжьагъэх Къыблэ дзэ округым изэхэт стратегическэ командование иинспектор куп хэт генерал-майорэу Александр Дорофеевыр, республикэ дзэ комиссариатым иотдел ипащэу Одэжьдэкъо Руслъан, Урысые дзэ-патриотическэ общественнэ движениеу «ЮНАРМИЯ» зыфиlорэм ишъолъыр отделениеу АР-м щыlэм ипащэу Джармэкъо Азмэт, апшъэрэ еджапlэм иректорэу Къуижъ Саидэ, икlэлэегъаджэхэр, щеджэхэрэр, дзэкъулыкъушlэхэхэм яlэхьылхэр.

Хэушъхьафыкlыгъэ дзэ операциер зыщыкlорэм щыlэ частьхэм яподразделениехэмрэ республикэ дзэ комиссариатымрэ зэдагъэпсыгъэ пэlудзыгъэ зэпхыныгъэ шlыкlэр агъэфедэзэ, дзэкъулыкъушlэ-студентхэр къэгущыlэхэу аублагъ. Ахэм яжэу щысыгъэхэ ягупсэхэр, яныбджэгъоу къадеджэхэрэр къызщытэджыкlыгъэх. Гушlуагъори, нэпсхэри зыхэтыгъэ зэlукlэгъур фэбагъэ хэлъэу рекlокlыгъ. Зидзэ пшъэрылъхэр зыгъэцэкlэхэрэ тиныбжьыкlэхэм зэряжэхэрэр, Текlоныгъэр яеу къызэрэкlожьыщтхэм яцыхьэ зэрэтелъыр къэгущыlэгъэ пстэуми къыхагъэщыгъ.

Апшъэрэ еджапlэм иректорэу Къуижъ Саидэ къызэриlуагъэмкlэ, университетым щеджэрэ нэбгыри ll4-рэ мы уахътэ хэушъхьафыкlыгъэ дзэ операцием хэлажьэх. Ахэр ыкlи яунагъохэр зэращымыгъупшэхэрэр, ящыкlэгъэ lэпыlэгъоу арагъэгъотыхэрэм ар къатегущыlагъ.

Телелъэмыджым иамалкlэ дзэкъулыкъушlэ-студент нэбгыри 6 къэгущыlэн зылъэкlыгъэр. Я 238-рэ гвардейскэ артиллерийскэ бригадэм имладшэ сержантэу Андрей Пимахиныр ахэм зэу ащыщ. Мыекъопэ къэралыгъо университетым икъутамэу Яблоновскэм дэтым иколледж иапэрэ курс щеджэзэ академическэ зыгъэпсфэыгъо ышти, дзэ операцием 2022-рэ илъэсым чъэпыогъум къыщегъэжьагъэу хэлажьэ.

Запорожскэ лъэныкъом щыlэ дзэ купхэм ахэт рядовойхэу Яхъулlэ Аслъанрэ (факультетэу «Прикладная математика» зыфиlорэм я 4-рэ курсым щеджэ) Муслим Ачхановымрэ (я 3-рэ курсым ис, юриспруденцием феджэ). Муслим икlыгъэ илъэсым ишэкlогъу мазэ, Аслъан 2023-рэ илъэсым икъихьагъу кlуагъэх. Вербового ыкlи Работино зыфиlорэ районхэм адэжь украинэ неонацистхэм къащырашlылlэгъэ зэпэуцужьыр мыхэр зыхэтхэ гвардейскэ дзэ армием зэкlифэн ылъэкlыгъ.

Таллиннскэ артиллерийскэ бригадэм хэтых рядовой Константин Гусаровыр (Поздняковыр) (политехническэ колледжым истудент) ыкlи ефрейторэу Руслан Агарковыр (инженернэ факультетым щеджэ).

Зэдэгущыlэгъу занкlэр окlофэ, лlыхъужъныгъэу, лlыблэнагъэу зэрахьагъэхэм ыкlи щытхъу хэлъэу ядзэ пшъэрылъхэр зэрагъэцакlэхэрэм афэшl тикlалэхэм къалэжьыгъэ медальхэр якомандирхэм къаратыжьыгъэх.

Лlыхъужъныгъэм иорден къызэратыгъэ младшэ сержантэу Андрей Пимахиныр илъэситlум ежьагъ хэушъхьафыкlыгъэ дзэ операцием зыхэлажьэрэр. Уlэгъэ хьылъэ къытыращи ипсауныгъэ зыпкъ зырегъэуцожьым, къулыкъушlэхэм ясатыр хэуцожьыгъ. Ащ ишъхьагъусэу Софье гущыlэгъу тызфэхъугъэхэм ащыщ.

– Андрейрэ сэррэ пшъэшъэ цlыкlу зэдэтэпlу. Икlыгъэ илъэсым ишышъхьэlу мазэ ар къэхъугъ, мазэ зэрэтешlэу гуфакlоу ежьыр кlуагъэ. Ащ ыпэкlи зэзэгъыныгъэкlэ къулыкъур ыхьынэу фэягъ, ау сабыир къэхъуфэ ежагъ. Мобилизациер зырагъажьэм, ыбгъукlэ щытэу яплъынэу фэягъэп. Сэ сизакъоп, унэм исхэр зэкlэ Андрей ежэх: янэ-ятэхэри, ыши, ипшъашъи. Ар тэркlэ Лlыхъужъ шъыпкъ, – хигъэунэфыкlыгъ Софье. Яхъулlэ Аслъан иlэхьыл-гупсэхэри зэхэтхэу къекlолlагъэх. Ащ ышыпхъоу Сусанэ иеплъыкlэхэмкlэ къыддэгощагъ:

-Тшынахьыкlэ кlэлэ ныбжьыкl, джыри унагъо ышlэнэу игъо ифагъэп. Хэушъхьафыкlыгъэ дзэ операциер рагъажьи, Хэгъэгум lэпыlэгъу ищыкlагъэ зэхъум щысын ыдагъэп, зэзэгъыныгъэм кlатхи кlуагъэ. Ащ ышlыгъэ унашъом зэкlэми дедгъэштагъ. Лъэшэу тыфэгумэкlы , тежэ. Игъэхъагъэхэр непэ къызэрэхагъэщыгъэр ошlэ-дэмышlагъэ тфэхъугъ, ар телелъэмыджым нэрылъэгъу къытфишlыгъ. Аслъан къауlэнэу игъо ифагъ, госпиталым мэзитlурэ щеlэзагъэх. Зыпкъ зэреуцожьэу ыгъэзэжьыгъ. Тыгъэгъазэм ыкlэхэм ар зыгъэпсэфыгъом къэкlонэу тежэ.

Къалэу Грознэм къикlыхи, Муслим Ачхановаым янэрэ ышыпхъурэ къэкlуагъэх. Пэlудзыгъэ шlыкlэм тет нахь мышlэми, якlалэ зэралъэгъугъэм ахэр рыразэх. Икlыгъэ илъэсым ишэкlогъу мазэ къыщегъэжьагъэу зэ нахь алъэгъунэу хъугъэп, ари уlагъэ телъэу къызэкlожьыр ары.

-Телелъэмыджыр зэхэзыщэгъэ пстэуми лъэшэу тафэраз, – еlо Муслим ышыпхъоу Хедэ. – Ащ иамалкlэ сшы тлъэгъуни, зэхэтхыни тлъэкlыгъэ. Тилlыхъужъ къызэрэкlожьыщтым тежэ, Текlоынгъэр къызэрэдахыщтым тицыхьэ телъ.

Мыщ фэдэ телелъэмыджхэр зэрэкъэралыгъоу ащырагъэкlокlынхэр хабзэ хъугъэ. Мыекъопэ къэралыгъо технологическэ университетыр чlыпlэ афэхъуи, Адыгеимкlэ апэрэу зэхащэгъэ зэдэгущыlэгъу занкlэр джыри къыкlэлъыкlонэу зэрэщэгугъухэрэр хэлэжьагъэхэм къыхагъэщыгъ.

 

lэшъынэ Сусан.

Сурэтыр Артур Лаутеншлегер тырихыгъ.

Адыгэ Макъ

CEVAP VER

Lütfen yorumunuzu giriniz!
Lütfen isminizi buraya giriniz