Ԥхынҷкәынмза 11 рзы ААУ афилологиатә факультет аурыси аҳәаанырцәтәи алитература акафедра аҿы имҩаԥысит М.Иу. Лермонтов ирҿиара иазку агәалашәаратә хәылԥазы.
ААУ афилологиатә факультет аурыси аҳәаанырцәтәи алитература акафедра арҵаҩы еиҳабы Асҭанда Константин-иԥҳа Бигәаа еизаз адунеитә литературатә процесс аҿы ашәҟәыҩҩы ирҿиара иамоу аҵакы ахадара иазхьалырԥшит. «М.Иу.Лермонтов – ари алитературатә ҭоурых аҿы акыр зҵазкуа ахьӡ адагьы, аԥсҭазаара ҵакыс иамоу азхәыцрақәеи азықәԥарақәеи рыла игәылҭәааз аепоха ду асимволны иҟоу иоуп», – ҳәа илҳәеит лара.
Асҭанда Бигәаа Лермонтов ирҿиара иааҳакәыршаны иҟоу адунеи аҿы аԥшӡара аԥшаара, ауадаҩрақәа урцәымшәо угәҭакқәа рынагӡаразы агәазҭазаара унаҭоит ҳәа иазгәалҭеит. Аусмҩаԥгатә аҳәаақәа ирҭагӡаны астудентцәеи урҭ рырҵаҩцәеи ажәеинраалақәа, Лермонтов ипроза аҟынтәи ацыԥҵәахақәеи ирыԥхьон, уи ибиографиа аҟынтәи ахҭысқәа ирылацәажәон.
Апоет ду иԥсҭазаареи ирҿиарамҩеи иазкны акиноматериалқәа рыдгалара мҩаԥган. Астудентцәа инарыгӡеит ҟабардатәи ҭауади-аамсҭеи рыкәашара «Кафа». Иадырҳәеит М.Иу. Лермонтов иажәеинраалала иҩу ароманс «Схала амҩахь сцәырҵуеит сара» («Выхожу один я на дорогу»). Уи наигӡеит анемец филологиа афакультет 2-тәи акурс астудент Влад Ванача.
ААУ аҵара зҵо Шьамтәылеи Ҭырқәтәылеи инхо аԥсуа диаспора ахаҭарнакцәа араб бызшәалеи аҭырқә бызшәалеи апоет иажәеинраалақәа ирыԥхьеит. Иара убас апоет ирҿиамҭақәа англыз, анемец, иара убас аԥсуа бызшәала ирыԥхьеит.
Иаԥхьеит иара убас аԥсуа литература акафедра арҵаҩы Инал Гыцба еиҭеигаз апоет ирҿиамҭа «Аматанеира» («Молитва»). (Апсныпресс)
