Цӏыхубзым псищэ ӏуту жаӏэ. Мыр пэж дыдэщ. Ар зыхэмызагъэ, абы и зэфӏэкӏ зыхимылъхьэ, къемыхъулӏэ щыӏэкъым. Гурэ псэкӏэ цӏыхубзыр зыбгъэдэувэ лэжьыгъэри хъер и лъэныкъуэкӏэ къотыгъэ, къощыгъэ, телъыджэуи зыкъызэкъуех.
Жыпӏэнурамэ, адыгэ жьэгум къитэджыкӏа цӏыхубзыр сыткӏи щапхъэу къогъуэгурыкӏуэ. Дзэлыкъуэ куейм хыхьэ Дзэлыкъуэкъуажэ щыпсэу Тэтрокъуэ-Джатэ Людэ зи лэжьыгъэкӏи, цӏыху хэтыкӏэкӏи, хьэлкӏи, теплъэкӏи куэдым ефӏэкӏ цӏыхубзщ, си псалъэхэри нобэкӏэ зыхуэзгъэпсыр аращ.
Зэгурыӏуэрэ зэдэӏуэжу псэу унагъуэм къыщыхъуа Людэ дахагъэу хэлъыр адэ-анэм къыхалъхьамэ, абы гъэсэныгъэу бгъэдэлъым и къежьапӏэр и анэшхуэрщ. Адыгэ хабзэр бзыпхъэ дахащэу хъыджэбзым бгъэдэзылъхьэ нанэ ӏумахуэр дауикӏ щыгъуазэт нэмыс цӏыхум зэрыхуэщӏыпхъэр, узыпэрыувэ ӏуэхугъуэм уи зэфӏэкӏ зэрыхэплъхьапхъэр, гъащӏэм пкъыфӏэу узэрыхэпсэухьыпхъэр. Фӏыуэ, фӏыгъуэу щыӏэр зыхалъхьа, зыбгъэдалъхьа Людэ арагъэнущ нобэ цӏыху гурыщӏэу щӏыщытри.
Егъэджакӏуэ-гъэсакӏуэ ӏэщӏагъэр зиӏэ цӏыхубзыр Дзэлыкъуэ куейм и ПАО «Россети Северный Кавказ» филиалым и лэжьакӏуэ пэрытщ. Къуажэхэм уэздыгъэр дэтхэнэ зы унагъуэми тэмэму щыблэн зэрыхуейм, зыгуэркӏэ ныкъусэныгъэ гуэрхэр къэхъумэ ар икӏэщӏыпӏэкӏэ гъэужьыхыным, цӏыху электроэнергэ зыгъэсхэм гупсэхуу ябгъэдэтыныр и къалэнхэм хохьэ Тэтрокъуэ-Джатэм. Илъэс 17-м щӏигъуауэ лажьэ цӏыхуэбзым зыгуэрым и жагъуэ ищӏауэ, лэжьыгъэ зыбгъэдэтымкӏэ псалъэмакъ къыщыӏуауэ, уэздыгъэр зыгъэсхэм я упщӏэхэм жэуап тэмэму иримытауэ къэхъуакъым. Лэжьыгъэм псэемыблэжу бгъэдэт цӏыхущ ар. Дызэрыщыгъуазэщи, щӏэх-щӏэхыурэ уэздыгъэм и уасэр хохъуэ. Абы къыхэкӏыу цӏыхухэм я мыарэзыныгъэкӏэ зыхуагъазэ Людэ. Абы упщӏэкӏэ зызыхуэзыгъэзауэ жэуапыншэу къэна щыӏэкъым. Теплъэ гурыхьыр зиӏэ, макъ щабэкӏэ къопсалъэ, гурыӏуэгъуэ дыдэу ӏуэху къекӏуэкӏым ущызыгъэгъуазэ цӏыхубзым укъыдехьэ. Цӏыхум и нэгум уиплъэмэ ар сыт хуэдэми къыбощӏэ хьэлкӏэ. Людэ хьэлкӏэ щабэщ, гу хуабэщ, псэ телъыджэ зиӏэщ.
Мызэ-мытӏэу упщӏэкӏэ, лъэӏукӏэ зызыхуэзгъэза Тэтрокъуэ-Джатэ Людэ напӏэзыпӏэм псори тэмэм схуищӏащ. Зи лэжьыгъэм фӏыуэ хэзыщӏыкӏ цӏыхум и сэбэпри нэхъ псынщӏэу къыплъос.
Анэшхуэ-адэшхуэм,адэ-анэм Людэ щытепсэлъыхькӏэ удехьэх. Цӏыхубзым къипсэлъ псалъэхэм яхэлъщ, ящӏэлъщ лъагъуныгъэ, пщӏэ, нэмыс. Нэхъыжьыфӏым ягъэса цӏыхум ӏэмал имыӏэу и унагъуэми щызекӏуэр дахагъэщ. Аращ Людэ и унагъуэми курых хуэхъур.
Иджырей гъащӏэм дакъикъэ къэскӏэ щӏэуэ къежьэр пхужымыӏэнщ. Къежьэ псоми гуэгъу зыхуэпщӏыфынкъым, ауэ куэд зыщӏэ, къежьэ мымащӏэр къэзыгъэсэбэпым къехъулӏэр, лэжьыгъэкӏэ зэфӏигъэкӏ-зэфӏихыр мащӏэкъым. Ар къызыгурыӏуэ Тэтрокъуэ-Джатэми и лэжьыгъэр егъэнщӏыф щӏэ куэдкӏэ. Дунейпсо бэджыхъымрэ крмпьютерымкӏэ длэжьыр мымащӏэми, зыщыдгъэгъупщэн хуейкъым цӏыхум и псалъэм къару ин зэрыхэлъыр. Упщӏэ иӏэу, гузавэу къыббгъэдэхьа цӏыхум псэхугъуэ зэрептыфынур псалъэкӏэщ, ӏуэхур зэрыблэжь ӏэмалхэмкӏэщ. Людэ бгъэдыхьэ дэтхэнэри къызэрыбгъэдэкӏыжыр нэжэгужэущ, гуапагъэ нэскӏэ гъэнщӏауэщ.Мызэ-мытӏэу зи лэжьыгъэкӏэ щапхъэу къалъыта Джатэ-Тэтрокъуэм щытхъу, фӏыщӏэ тхылъхэр къыхуагъэфэщащ.
Срогушхуэ Лудэкӏэ, сропагэ! Сыхуейщ щыӏэри, щыӏари, щыӏэнури зи ӏэмыщӏэ илъ Алыхьым абы узыншагъэ быдэ къыбгъэдилъхьэну.
Пщӏэ хузощӏ!
