Ног азы хорзæх уæ уæд, Иры дзыллæтæ!
Хуыцау уын арфæ ракæнæд! Иры зæдтæ, дауджытæ уын хæрзгæнæг уæнт!
Ног аз ног хæрзтæ æрхæссæд! Æвзæрæй цы уыд царды, уыдон та зæронд аз йемæ ахæссæд.
Ирон адæм фæкувынц, бæстæ сабыр куыд уа, нæ уæнгты уа æнæниздзинад, нæ бакуысты – бæркад, æмæ нын ахæм лæвар Иунæг Кадджын Стыр Хуыцау саккаг кæнæд! Ног азы йæ райдайæнæй йæ кæронмæ уарзон адæмы ‘хсæн цинты цæуæг ут! Кæрæдзийы уарзгæйæ цæрут! Хуыцау нæ фыдбылызæй хызт уадзæд, фыдæзнаджы фæндийаг нæ макуы уал фæкæнæд.
О Стыр Хуыцау! Кæддæриддæр дын дæ ном куывдты æмæ чындзæхсæвты куыд арæм, ахæм цард ныл бафтау! Де ’сконд зæдтæ æмæ дауджыты хорзæх дæр нæ уæд!
Сыгъзæрин Уастырджи, Хуыцауæй — ирон адæммæ, ирон адæмæй — Хуыцаумæ, дыууæрдæм минæвар дæ, Хуыцаумæ фæндаг дын уæгъд у, æмæ-иу курдиаты бон йæ хорздзинæдтæй ирон адæмæн ракур. Ирон адæмыл ног азы рæстæрдæм куыд аудай, ахæм амонд сæ уæд! Дæ рахиз базыры бын сæ кæн! Хуыцауы фыдæхæй сæ хъахъхъæн! Байрагæй бæх кæныс, лæппуйæ та — лæг, æмæ нæ кæстæртæ — де уазæг! Фыдбылызæй сæ бахиз! Бынаты дæр, фæндагыл дæр — кæддæриддæр дзæбæх куыд уой, уыцы арфæ сын дæ цæст бауарзæд!
Ног азы хорзæх дæ уæд, Ирыстон-Алани! Стыр Хуыцау æмæ уæ Уастырджийы хорзæх уæд, мæ зынаргъ æмтуг адæм!
Ног, 2024 азы хорзæх уæ уæд!
