ХIадкIылазтын щарда хIылшуштI (Сэрия 4)

OLYMPUS DIGITAL CAMERA

Асквш 2019 ноябрь агIан хIапхъанчIвиква радгьыл хIанца хIзынйаз хIайщчви хIахщчви пхата хIгвы йгIатахатI. Ацриква рапш дгIахIайгвыргъьатI ауат амшква рагIан хIызрайгваз «Абазашта» газет аредактор хъада КЪВЫЛ Фардауыс Кьазибан йпхIа.

Абаза бызшва йахъазымкIва адыгьа бызшвакIлагьи йгIахIачважваз ажурналист азцIгIара щарда лзынахIырхатI. ХIайчважвара апны абаза бызшвала йгIацIцIуа агазет атурых, ажвлара апны апхIвыс лмагIны, абаза уагIахъа злу ауысква ауатыкв йгIатагIгатI. УахьчIва «Жьынэпс» газет апхьагIвчва ауи швлабахIырдыритI.

-Къарча-Черкес аквта Черкесск къала апны бынхатI, ббзазитI. БъагIадзынгылыз, ъачIвагIа бъапхьаз гIахIабхIвырма?
-Сцри кыт Псыжв акIвпI, ауи Черкесск йазаргвандзапI. Абаза кытква зымгIва рацкIыс йдупI. Ауаъа апхьарта сгIалгатI, ауи амщтахь педагогика училища йгьи Къабард-Балкъар къральыгIва университет сапхьатI. СъачIвагIала сарыпхьагIвпI, сфилологпI. АрыпхьагIвта сынхатI, акомсомол йгьи партия органква рпны санынхуз адгалра уысква сырзырбжьатI. Ажурналистра ласы тшгьадсымкIылтI. ХIреспубликала йгIацIцIуа агазетква зхъпшылра йацIу ауагIахъа уысквала, ажвлара коммуникацияквала йгьи печатьла а-Министерства апны хвысквша сынхатI, ауагIахъа газетква сыдрыюагъьалын. Ауи амщтахь асквш 2002 агIан абаза газет аредакция сгIайтI. Уысипхьадзагьи хъакI амапI. Совет заман агIан апхьартаква рпны классипхьадза абльын газетква дрыхIазыруан, ауаъа акIвзапI саргьи сквш 20 зстыз ауыс «ансызгIашIыха».

-УахьчIвала азаман тшаквшвыргIапсуата Къарча-Черкес апны йахъазымкIва «Абазашта» газет анахьанат ашIыпаква йбзазауа йырдырра ахIатырла амальта йгIашврысабапуайа?
-Азаман мгIвайситI, абзазара ашIыцраква гIалалитI. Къарча-Черкес йту абазаква зыкь 37 йгьайхIам. Ставрополь, Москва, датша къалаква збзазартахаз хIышта йыншауа тшахадыргIвазарныс рылшара ахъазла Интернетгьи Инстаграмгьи гIахIрысабапитI. ХIгазет гIацIщтрипхьадза abazashta.ru сайт апны йанхIыргIалитI, абазаква шIыцрата йрылу abazashta_smi Инстаграм напа апны ансимшы йтахIцIитI. Ашвъабыгъь газет рахIа йззаргвану ахIбачва ракIвпI, чкIвыныргIа уахьчIвала ауыжвгIанчIви амальквала тшырзынауырхара шатахъу гIахIгвынгIвитI. ХIапхьагIвчва, йапшым акъвырльыкъвхартаква, агIвымакъральква йбзазауа хIызларабадыруа электронна почтагьи хIымапI – abazashta-inbox@mail.ru. Агазет почтала йгIацIзыгIвгIауа рунагIваква йырзыргитI, анахьанат компьютер йгьи телефон гIадрысабапитI. Арат агIвквпшыракI азакI азакI дырбайитI, ужвыгьи сквшквакI ауаса йаъазлушызшва йызбитI.

-АшIаква апхьара дукI тшгьартхуам, ауат разыгIальаматра гIахъшвкъьалырныс швылшума?
-ЦIабыргыпI, уахьчIвала чкIвыныргIа хъызхуа датшапI. Ауаса ауат агазет йазаргванчIвра хIащтата ашIаква йырзынарху агIвыраква хIрыщардитI, йапшым анкъвакъвраква адыгIгалитI, рпатриот лахIвараква рыбагъьара ахIатырла дасу дъауу акытла хабаркI шгIанихуаш хIащтапI. АчкIвынчва аспорт рымагIальаматпI, ахIвсса – апшдзари аунагIва уыскви йырзынарху агIвыраква. Дара ашIаква ргIатгараква аргамта йшхIчпуш хIазынхитI, «АшIара», «ХIуыжвгIанчIвиква» рубрика зхъадзгылу агIвыраква рпны бзита йапхьауа, аъачIвагIагIв шIаква, аспорт йгьи акультура рпны адахIвраква йырзынадзаз зыргвышхвауа агIвыраква гьмачIым.

-ХIтурых шта – Къарча-Черкес, Адыгея, Къабард-Балкъар рхабарргагаква рпны йынхауа ршвапха хIхIырдырра ахъазла хIрынйатI. Къабард, черкес, адыгьа, абаза, абхаз, щапсыгъ бызшваквала йгIацIцIуа агазеткви ажурналкви рредакцияква йрунашвачпагIву хъачвапI, «Абазашта» таредактор дбзытлхвыгIата йаныгIдыр швабыжта йджьахIщатI. Трыкв апынгьи ажурналистква райхIара пхIвыспI, ауаса аунашвачпагIвчва мачIдзапI. ДжьауапкIра ду зпщылу арии ажвлара уыс анкъвгара апхIвыс лыхъазла йгьбаргвымма?
-Йапхъахауа асквшква рагIан сынхара ауагIа «мчыта йшахъпшылуа» сыласхIвун. Абаза бызшвала агазет йапхъахауа аномер асквш 1938, июль а 23 йгIацIцIтI. Сквшы 82 руацIа ауи ауагIахъа ртурых йамшгIвырата йырпхьадзитI. Сапхъала йынхаз аредакторква швапха байа змаз, алитература, авласть органква рпны зыхьыз бергьльыз хъачван. Сквшы 38 снадзахьан агазет агIаныршагIвчва –а-Правительстви а-Парламенти– аредакторра ангIасызхъарцIа, ауагIа ауи аныбыжьгIвацагьи намхъауата йхъвыцуан. АуагIа, агазет апхьагIвчва разхъацIара гIатугара ахIатырла чхIара уылата, уамайчуата, ашIыцраква уызгIауата, ахIбачва ргIатгараква узыхчауата уынхара атахъыпI. СырзыразпI сгIазлалыз агвып, дзачIвызлакIгьи йборч гвыцкьала йшйырхъйуш йащтан, цIагылагIвта йсзалтI. Абзазарагьи апсахраква гIалалитI – уахьчIвала газет щарда рунашвачпагIвчва бзытлхвыгIапI, ауи заджвгьи йгьджьайщахуам.

-Бара аполитика уысква бырхъйауата Къарча-Черкесла АуагIа Айззара (а-Парламет) бадепутатын. Ари атланыкъвала буысхара гьашIабымрысхзапI, ажвлара йгьи аполитика уысква бгьырхъвымцIзапI.
-Аполитика уахъвыцра утахъдзазтынгьи йара угьаунащтуашым. Ахабзалыхра орган апны йсырхIаз ашвапха сынхара апны йсысабапхитI. ХIкъральла хъгалра зму «Единая Россия» партия салапI, «Россия саби Фонд» КЧР-ла ахъвшара унашва ахъсцIитI. ХIыжвлара злу уыскIгьи хIгьагIвсуам. Агазет апхьагIвчва йырзынахIырдзитI. Агазет йгIаквшвауа гIвырипхьадзагьи аполитика тланыкъвала уадгылра атахъыпI. ЙхIыгвлачвата йбзазауа анахьанат ауагIахъаква хвы хIыквырцIара ахъазла хIуысква зымгIва пшдзазлара, азаджв азаджв пIатIу йзыхIчпара хIборчпI.

-УахьчIвала хIайщчва-абазаква шIыцрата йшвылайа?
-Абаза кытква 13 йнадзитI, уахьчIвала кытипхьадза апны ауагIа зайгвыргъьуш ауыс пхатшаква дырхъйитI – Хъвыжвду апны тшпсщарта йгьи культура Тдзы гIаншатI, акъвбинаква спорткомплекс йгьи культура Тдзы раутI, албыргIанква рыхъазла сабигIзарта шIыц руыхвитI, Гвым апны уагIахъа тшпсщарта, ашIаква аспорт тшъазырбжьуш гIахъыртIытI ауасамцара.

Абазаква уахьчIвала рахIа хIшадкIылу сызрыбагъьуштI. АуагIахъа жвлара мгIвайсраква, «Алашара» акоммерция йалам организация, адуней абаза-абхаз Конгресс, абаза телебара, хIгазет, хIуагIахъа театр, аршIыйагIвчва гвыпква – зымгIва аргваныта хIацынхитI, хIуагIа апсахра бзиква шрылархIвуш хIащтапI. А-Конгресс къраль щарда йбзазауа аднакIылитI, Трыкв, Франция, Иордания йту ауи анхара джьгарта йгIалалитI.

АхIаракьатчпагIв, КЧР АуагIа Айззара (а-Парламент) апредседатель йзаместитель Эгьзакь Мусса ХIабальа йпа йцхърагIарала уыс бзи щарда хъйитI. Ауат ауагIа йырдырра ахъазла цбызшвакIла – абаза, абхаз, трыкв, ангьльыз, гIарып, урышв бызшваквала йатакIта ахабарква, агIвыраква гIатарцIитI. Трыкв йбзазауа International journal «Country of Abaza» гIадрысабап ауаштI.

ЗымгIва рацкIыс йхъаду ауагIахъа пхьадзара шакIву зымдыруада? ЙцIыхъвахауа асквшква адуней йгIаквылуа ъащардагIвхауа хIайгвыргъьитI, ауаса йанаъазара хIабадучва рыбызшви ртурыхи зхчуш гIадзынгылуаштI. Адунейла тшауацIызхыз коронавипус тшщаквнакIыхта ужвы хIышта швангIайра хIхъа аладухауата йшвхIырбуш апсахраква, йшвахIхIвуаш рахIагьи йшщардазлуш кьангьаш гьазхIымам. ЗгIвадара багъьа швымазтI, хIайщчви хIахщчви!

CEVAP VER

Please enter your comment!
Please enter your name here