Синбилгало а къастале, Зу-кIорни а, ЧайтаI а йолчу еара Пхьагал.
– ХIей! – мохь хьаькхира цо. – ХIей! ХIее-хIе-ей!
– ТIаккха? Дийцахьа, – элира ЧайтаIо.
– ЭхIе-хIе-хIе-хIе! – мохь хьоькхура Пхьагало.
– Схьаалахьа сихха! – оьгIазйоьдуш лаьттара Зу-кIорни.
– ЭхIе-хIе-хIе-хIе! ХIе-хIей! ХIе-хIей! – дIаедира Пхьагал.
– И хIун ду?
– Ца хаьа, – элира ЧайтаIо.
ТIемаш девлча санна, уьдура Пхьагал хьуьнхахула, аз ма-доллу мохь а хьоькхуш.
– Цо хIун до? – хаьттира Тарсало.
– Со кхеташ дац, – элира Зингато.
Пхьагал-м боккха го а баьккхина, юха ЧайтаIан кетIа хIоьттира.
– Ахь схьаолу я ца олу? – собар дайнера ЧайтаIан.
Пхьагал цIеххьана саца а сецна, тIаьхьарчу когаш тIе а хIоьттина…
– Алий ялахьа! – мохь белира Зу-кIорнига.
– Ва-кIа-кIа-кIа! – аьлла ела а елла, ког ма-боллу чехка дIаедира Пхьагал.
– Хьекъалх тилла те и, тилла те, тилла те? – ца соцура ЧIегIаг.
– Хьекъалчохь ю и, хьекъалчохь, хьекъалчохь, – дуьхьал лоьра ХенакIур.
Еккъа цхьа Пхьагал яр-кха цхьаьнгга а хIумма а ца хоьттуш, ца дуьйцуш, мох санна маьрша, хьуьнхахула хьаьдда лелаш.
– Хьажахьа, – элира ЧайтаIо. – Суна хетарехь, цунна ша мох бу моттаделла-кх… Цо соьга цкъа ала а ма элира, шех цкъа мох хилча муха хетар дара аьлла.
– Ма хаза хир дара иза, – элира Зу-кIорнис. – Амма Пхьагална дагадогIур дац-кха ишттаниг цкъа а…
Эццахь гIалат яра Зу-кIорни.
ХIунда аьлча, Пхьагална Iуьйранна дуьйна а тарбеллера шех хьаннашца, аренашца кхерсташ болу гуьйренан маьрша мох.
