КъЧР-м щIыхь зиIэ и журналист, Урысейм и журналистхэми и тхакIуэхэми я Союзхэм хэт Абидокъуэ (Щохъужь) Люсанэ и Iэдакъэ къыщIэкIа, илъэс 15-м къриубыдэ гуащIэ ин зыхэлъ, «Афган – 1979 – 1989» тхылъ купщIафIэм иджыблагъэ лъэтеувэ щыхуащIащ Хьэбэз къуажэм дэт щэнхабзэмкIэ Унэм.
Гу зылъытапхъэщи, мы тхылъыр журналистым и Iэдакъэ къыщIэкIа етIуанэ къыдэкIыгъуэщ. 2020 гъэм и кIэухыу, дыгъэгъазэ мазэм дунейм къытехьауэ щытащ «Нэмыгъэса макъамэ» зыфIища, адыгэ лъэпкъым къыхэкIа уэрэджыIэ къызэрымыкIуэ Щохъужь Хьэлым и гъащIэмрэ и творчествэмрэ къыздигъэлъэгъуэжа тхылъыр. Журналистым и ещанэ тхылъри — «Забвению не подлежит» фIэщыгъэцIэр зиIэри, дунейм къытехьэну хьэзырщ…
