Къэбэрдей-Балъкъэрым ипэкlэ зэи къыщымыхъуауэ адыгэ бзылъхугъэ, пщащэ лъэгъугъуафlэ, спортсмен бэлыхь Бекъул Миланэ, хьэлэмэтращи, адыгэ щlыналъэм – Адыгэ республикэм щыlэу тхэквондомкlэ (ВТФ, Олимп джэгухэм хыхьэ лlэужьыгъуэмкlэ) Урысей Федерацэм и чемпионату мы гъэм, Мейкъуапэ щекlуэкlам япэ увыпlэр къыщихьащ. Абы къыдэкlуэу тхэквондомкlэ дунейпсо классымкlэ спортым и мастер цlэ лъапlэри къыфlащащ, ари ди республикэм щыяпэу. Миланэ и ныбжькlэ щlалэ щхьэкlэ хузэфlэкlащ къэралым и командэ къыхэхам хыхьэн, икlи и хьэлъагъ елъытауэ зыкъыщигъэлъагъуэ килорамм 46-рэ хъу гупым я деж бжьыпэр УФ-м щиlыгъщ.
Адыгэ пщащэ цlыкlум тхэквондом щиlэ ехъулlэныгъэхэм уатепсэлъыхьын щlэбдзэмэ, зэрыжаlэу, махуэней пхутегъэкlуэдэнущ. Медалрэ кубокыу Миланэ иlэр щэ бжыгъэм зэрынэхьэсащ. Адрей илъэс блэкlахэмкlэ умыlэбэжу, мы гъэ къудейм дунейпсо утыкушхуэхэм абы щыхузэфlэкlахэр къыхэбгъэщмэ, Африкэм щыlэ Сенегал къэралым и къалащхьэ Даккар бадзэуэгъуэм щекlуэкlа «Гран-при» зэхьэзэхуэм япэ увыпlэр къыщихьащ. Абы иужькlэ екlуу хэтащ Франджым и къалащхьэ Париж и «Гран-при» зэпеуэм, иужькlэ Мейкъуапэ щекlуэкlа УФ-м и чемпионатым щытекlуащ, а псом ищlыlужкlэ, щэкlуэгъуэ мазэм, къэралым и командэ къыхэхам хэту Белоруссием и «Кубок зэlухам» япэ щыхъуащ.
Езы хъыджэбз lэмащlэ-лъэмащlэ цlыкlур щыплъагъукlэ, апхуэдэ къарурэ ерыщагърэ абы къыкъуэкlыну уи фlэщ пхуэщlыркъым. Зэхьэзэхуэхэм Миланэ къыщыпэщlэтхэр зы щхьэкlэ нэхъ лъагэщ, ауэ абы щхьэкlэ къэмынэу зэкlэлъхьэужьыу ахэр трегъэкlуэт. Европей къэралхэм «танк цlыкlу» къыхужаlэ Миланэ, абы и зэфlэкlыр здынэсыр ящlэри.
Тхэквондом зэрыхыхьам, а спорт лlэужьыгъуэр къыщlыхихам теухуауэ Миланэ жеlэ: «Илъэсибл сыщыхъум сэ сщlэрт ар зищlысыр. Зэгуэрым телевизорымкlэ сеплъат зэхьэзэхуэр зэрекlуэкlым икlи къызгурыlуащ сэ абы нэмыщl нэгъуэщl спорт лlэужьыгъуэкlэ зызгъэсэну сызэрыхуэмейр. Къафэми, художественнэ гимнастикэми сахуеплъэкlыжакъым абы иужькlэ. Мурад сщlащ тхэквондом ехъулlэныгъэхэр щызыlэрызгъэхьэну. Сыщlэхъуэпсырт утыкушхуэм ситу си цlэкlэ къэрал гимныр къеуэу зэхэсхыну», – жеlэ Миланэ.
Зригъэхъулlащ адыгэ пщащэ цlыкlум и хъуэпсапlэр: абы и щlыхьэкlэ утыкушхуэ lэджэми мызэ-мытlэу къыщеуащ къэралым и гимныр. Илъэс зыбжанэкlэ узэlэбэкlыжмэ, Европэм пашэныгъэр къыщыхьыным хуэунэтlауэ Испанием щекlуэкlа зэхьэзэхуэм япэ увыпlэр щиубыда нэужь, Миланэ жиlат, сыт хуэдэ лъагапlэми удэкlуеинри зэрыгухэхъуэр, ауэ езым и плъапlэ нэхъыщхьэу щытыр къэралым и командэ къыхэхам хэхуэныр, Олимп джэгухэм хэтыныр зэрыарар.
Миланэ иджыпсту зыщегъасэ республикэм и Кенжэ къуажэм дэт «Пять колец» спорт академием и тренер нэхъыщхьэ Ахъмэт Амир и деж. Тренер губзыгъэм, набдзэгубдзаплъэм, зи lэщlагъэм фlыуэ хэзыщlыкlым занщlэу гу къылъитат хъыджэбз цlыкlум. Ар япэу щилъэгъуам щыгъуэ, шэчи къытрихьатэкъым, ерыщу зигъасэу щытмэ, лъагапlэ нэхъ ин дыдэхэр Миланэ къызэрыхуэщтэнум, икlи щыуакъым.
«Тренерым и lэщlагъэм хищlыкlыу щытмэ, спортсменым дежкlэ ар ехулlэныгъэшхуэщ. Ахъмэт Амир хуэдэ тренер гъуэтыгъуейщ. Ар цlыху хьэлэмэтщ икlи гъэсакlуэ lэзэщ. Си фlэщ мэхъу абырэ сэрэ лъагапlэ куэд иджыри къызэрытхуэщтэнур», – жеlэ езы Милани.
Ди жагъуэ зэрыхъущи, иджыпсту къэралым къращlылlа дэкъузэныгъэхэм я lэужьу, ди спортсменхэр хуиту утыку ихьэжыфыркъым, ауэ тхэквондомкlэ зызыгъасэхэм ар щхьэщахащ икlи абыхэм хуитыныгъэ къратащ зэхьэзэхуэхэм хэтыну.
Дыгугъэнщ Бекъул Миланэ и щlыхькlэ къэралым и гимныр Олимп джэгухэм я утыкум къыщеуэну, и тренер Ахъмэт Амиррэ езымрэ я хъуапаспlэр къайхъулlэну. Дэ тщlэращи, ар гукlи псэкlи абы хуэхьэзырщ, шэчи къытетхьэркъым, апхуэдэ lэмал кърату щытмэ, ар зэрызригъэхъулlэнум.
Адыгэ Псалъэ
