Ацәыргақәҵа «IS» – иаҳхысыз аамҭа амаӡақәа ҳзаазыртуаз, аха иқәццышәаа ицаз асахьаркыратә ҟазара арҿиамҭақәа ирызкуп. Амцабз иахәхаз ахьыршәыгәқәа ирцәынхаз ахәеи арацәеи заҵәык роуп. Иблит ажәлар рҭоурых, рдоуҳа, рхәыцра аазырԥшуаз артефактқәа. Аха, иагьа ус иҟазаргьы, ари арыцҳара ашьҭахь аҟазараҟны аиҭаира, аиҭаҿиара ҟамлар ауам.
Асахьаҭыхыҩцәа иблыз артефактқәа бла ҿыцла ирыхәаԥшны, урҭ рҭыԥан иаԥырҵо иалагеит аԥсҭазаара ԥхьаҟа ишцо, ауаҩытәыҩса игәалашәара ус иаалырҟьаны ишҿымцәаауа шьақәзырӷәӷәо аԥҵамҭақәа. Абарҭ ацәыблыхақәа рҿы ижәбар шәылшоит агәалашәара шмыӡыз, аԥсҭазааразы ақәԥара шаҭаху. Иблыз арҿиамҭақәа ирцәынхаз ахәҭақәа хаз-хазы ишыҟоугьы, иааидкыланы аҟазара ишахәҭаку аадырԥшуеит.
Ари ацәыргақәҵала ҳара иҳалшоит иҳахьыз арыцҳарақәа, аполитикатә еибарххарақәа, ацәыӡқәа рышьҭахь аԥсҭазаара ҿыц ахь ашьаҿа аихгара шаҭаху аилкаара. Ацәыргақәҵа «IS» иабзоураны аҟазара убри аԥсҭазаара азықәԥараҟны хәы змам маругахоит. Џьарак итәам, ԥхьаҟа ихәыцуа ауаа ирыбзоураны абарҭ ашьаҿақәа абранӡагьы иааит.
2024 шықәса ажьырныҳәамза 21 рзы Аҟәа иблит Аԥсны Амилаҭтә сахьатә галереиа иатәыз асахьақәа ахьышьҭаз ахыбра. Акыр аҭоурыхтә артефактқәеи архивтә документқәеи блит. «IS» – амшын егьи аԥшаҳәаҟны иблыз, иӡыз, аха зышьҭа аанзыжьыз ахыбра иацырҟьоуп. Аусумҭақәа рыхәҭа хәыҷык аиқәырхара рылшеит асахьаҭыхыҩцәеи аҟазара абзиабаҩцәеи. Ҳара убри абылра зыла иабаз ҳҩызцәа-асахьаҭыхыҩцәа 10-ҩык рзы ацәыргақәҵа еиҿаҳкааит. Урҭ амца иалыргаз, ицәыблу аусумҭақәеи, урҭ ирцәынхаз арацәеи ахәеи ирылхны арҿиамҭақәа аԥырҵеит, агәалашәара мыӡырц, абри аҩыза арыцҳара ҟалазаргьы, аԥхьаҟа аԥсҭазаара шышьҭо атәы рҳәарц. Асида Аҳәба, Адамыр Аршба, Аԥшьа Ҳагба, Асҭанда Чамагәуа, Баҭал Џьапуа, Сабина Кәарҷелиа, Диана Хынҭәба, Олег Ҷедиа, Саида Кәыҵниа, Сипа Лабахәуа русумҭақәа цәырган цәыббрамза 5-19 2024 шықәса рзы Barın Han аҿы, ацәыргақәҵа акураторцәа – Денеф Хуваџь, Сине Ергьун.
