Юсупов Iилман
Нохчийн поэт ву. Цо чекхъяьккхина нохчийчохь юккъера школа а, A. A. Ждановн цIарах йолчу Ленинградан пачхьалкхан университетан историн факультет а. Белхаш бина школехь, газетийн а, журналийн а редакцешкахь, иштта нохчийн республикан ичкерин дешаран а, Iилманан а министерствехь министран хьалхарчу гIовсан даржехь. Юсупов Iилман поэзин ворхI книгин автор ву: «заманан мазлагIа» (1991), «доьналлин маьждиг» (1997), «иэсан гIу» (1999), «нохчийн кхерч» (шведийн маттахь, 2011), «илли а, мухIажаралла а» (гIазакхийн маттахь, 2015), «хьан кхерчан суй» (2015), «иэсаца къамел» (2016). Юсупов Iилманан байташ араюьйлу нохчийн, оьрсийн, украинхойн, болгархойн, шведийн, ингалсан, испанхойн меттанашкахь. 2001 шарахь дуьйна эмиграцехь ву иза. Карарчу хенахь швецехь вехаш ву. 2015-чу шарахь швецин пачхьалкхан яздархойн союзо шен могIаршка дIаэцна юсупов Iилман.
ЯЗДАРЧЕ
(сонет)
Илланчин цIе езаш, дарж дина, лело
Деса дош вотанах ахь декадо.
Сан ненан маттана мел хилла гIело
Хьан байташ ма-йийшши, ма шера го.
Шех хьакхаелча хьан йозанийн шело,
Къиг санна, хебна Iа хьан деган тIо.
ХIетте а, сирачу могIанийн кIело
Хьанна а ян хьаьгна хуьлуш ву хьо.
Ца яздеш хьо Iийча, хинболчу мэло
Джаннате буьгур бу масийтта бIо.
Делахь а, и ца деш хьо хIунда Iело
Тера ду, хетарехь, кхеттачух со:
Бакъволу илланча, гIелвелча, вело
Хьо цунна кховдийна совгIат ду кхиэло…
