Адуней апсуаабаза конгресс ЙхIаракIу асовет аунашвачпагIв Эгьзакь Мусса АААК аппарат аунашвачпагIв дитарагылыгIвта, акоммуникациякви хабарргарала аполитики друнашвахъцIагIвта Тарба Тенгьыз дйыргылтI.
Адуней апсуаабаза конгресс ЙхIаракIу асовет аунашвачпагIв Эгьзакь Мусса йгIацIищтыз аунашва апкъ йтата АААК аппарат апны ъанатIа шIыц гIандыршатI – Адуней апсуа-абаза конгресс аппарат аунашвачпагIв йтарагылыгIв, акоммуникациякви хабарргарала аполитики рунашвахъцIагIв. АъанатIа шIыц Тарба Тенгьыз ддыргылтI.
Нхара дъанарахвыз даквчважвауата Тарба йгIаликIгIатI ужвы йнанаркIыта АААК аустав апкъ йтата нхарата йакIвнаршауа ахабар йауацIыхта йшаргуш рыцIа гватра ду шазалырхуаш.
«АААК ЙхIаракIу асовет аунашвачпагIв Эгьзакь Мусса аКонгресс анхара аргамта йчпара ауысла хабарргарала аполитика астратегия шIыц щаквйыргылтI. Сара хачIв хъадата йсыкву ауи астратегия рхъйара, ажвлара адкIылара апны акоммуникациякви хабарргарала аполитики унашва рхъцIара акIвпI», – йхIватI Тарба Тенгьыз.
Ауи йгIацицIахтI а-Конгресс анхара йгIацIанакIуа аштаква рыцIарыцIа йшщардахауа, анаъа-араъа ашта йгьи ашIыпIа советква шгIандыршауа, ауи ауыс апхъахьылагьи штшауацIнахуаш. Ауаса йанаъазара адуней шабгу апны йгIаншахьаз йгьи йгIаншуш АААК ахъвшараква хабарргара ауысла рынхара йаразакIыта йагвныргIвра атахъхитI.
Тарба Тенгьыз йбергьльу афонд «Горная Абхазия» («Щхъа Апсны») гIанзыршаз йакIвпI. Ауи йара йахъихыз, Апсны гIазырбауа асуратква ргIарбартаква Италия, Германия, Россия, Сан-Марино, Приднестровье рпны йадигалтI. Тарба «Амдара гIазырбауа бзита йчпу асурат- йгьи авидеорепортаж» номинация апны гIван «Моя Планета» телебара канал ахча согIа гIайквнадыргатI. Пщысквша Апсны агIвымакъраль уысквала а-Министерства апны хабарргарала ахъвшара даунашвачпагIвта йгьи йазалху хъвдаквцIара зму хIвачIвгIвыта дынхатI. Йара ауи апшта Апсны туризмла а-Министерства апынгьи хабарргарала ахъвшара даунашвачпагIвта дынхатI.
Тарба Тенгьыз Россия ахвгIахвтра компанияквакIгьи унашва рхъицIун. 15 сквша райхIа агIаджвыквцIаракви абрендкви рнарыскIьара йапшым анархараква тшырзибжьауата маркетинг далан.
