(ИШТТА МА ХЬЕЖАХЬА СОЬГА, ЗУ-КIОРНИ)
- Туьйра: Козлов Сергей
- Гочдинарг: Петирова ПетIамат
– Хезий хьуна? Со мичча хенахь а, – элира ЧайтаIо, – мичча хенахь а.
Зу-кIорнис корта таIийра.
– ХIуъу хилла латтахь а, мичча хенахьа со тIекхочур ю хьуна. Со даима а уллохь хир ю хьуна.
Тийначу бIаьргашца ЧайтаIе а хьоьжуш, йист а ца хуьлуш, Iара Зу-кIорни.
– Йист хIунда ца хуьлу хьо?
– Со теша, – элира Зу-кIорнис.
Ор чу а йоьжна, кIира даьккхира Зу-кIорнис. Ларамза Тарсална карийра и, цу ор уллох тIехйолуш, Зу-кIорнин гIийла аз а хезна.
КIира дара ЧайтаIо Зу-кIорни лоьху. Ерриге а хьун толлуш лелла, са а хаьдда яра иза, Тарсал кхаъ баккха еъча. Сихха дIахьаьдира ЧайтаI Зу-кIорни цIа ялон.
ЮргIанах а хьаьрчина Iуьллура Зу-кIорни, тийначу бIаьргашца ЧайтаIе а хьоьжуш.
– Иштта ма хьежахьа соьга, – элира ЧайтаIо. – Ца мега со сайга цхьаъ иштта хьежча.
Зу-кIорнис бIаьргаш дIахьаббира.
– ХIан, хIинца елча санна, Iуьллу.
БIаьргаш схьаббилира Зу-кIорнис.
– Елалохьа, – элира ЧайтаIо.
Елаяла хьажира Зу-кIорни, амма гIийла дара и къажар.
– Ас хIинцца чорпа малор ю хьуна, – элира ЧайтаIо. – Тарсало керла жIаьлинускалш деанера, уьш кхехкийна ас чорпанна.
Кеда чорпа а йоьттина, Зу-кIорнин корта хьалаайбира цо.
– ХIан-хIа, иштта гIуллакх хир дац, – элира ЧайтаIо. – Охьахаа еза.
– Ца хаало, – элира Зу-кIорнис.
– Ас гIайба буьллу хьуна, иштта.
– Суна хала ду, – элира Зу-кIорнис.
– Сатоха.
Зу-КIорнина хина Iен атта хилийта, гIайба нисбира ЧайтаIо.
– Со шелло, – элира Зу-кIорнис.
– ХIинцца, хIинцца. – Беданара схьаеана кетар хьарчийра ЧайтаIо. – ГIора ца еш муха йисина те хьо? Буьйсанаш мел шийла ю!
– Со кхийсалора, – элира Зу-кIорнис.
– ВорхI дийнахь?
– Буьйсанна кхийсалора со.
– Яа хIун юура ахь?
– ХIумма а, – элира Зу-кIорнис. – Чорпа лой ахь суна?
– Ло, дера! ДIамалал, – элира ЧайтаIо.
Масех къурд а бина, бIаьргаш дIакъевлира Зу-кIорнис.
– Мала, мала!
– КIадъелла, – элира Зу-кIорнис.
– Мала! – Зу-кIорнина Iайгахь чорпа мелон йолаелира ЧайтаI.
– Кхин ца малало.
– Суна тIера!
Зу-кIорнис къурд бира.
– Тарсална тIера!
Мелира Зу-кIорнис.
– Пхьагална тIера! Иза а яра гIо деш!
– Собар, – элира Зу-кIорнис. – СадаIийта.
– Пхьагална тIера мала, къа ма хьегна цо…
Зу-кIорнис къурд бира.
– Оьпанна тIера!
– Оьпано хIун дора?
– ХIумма а. ХIора денна ян а йогIуш, хьо хоттура.
– Собар дайта цуьнга. Ницкъ бац, – элира Зу-кIорнис.
– Iуьйранна йогIуш меттиг а хуьлура, – элира ЧайтаIо. – цхьа Iайг мала.
Кхин а цхьа къурд бира Зу-кIорнис.
– Ткъа хIинца БухIанна тIера!
– БухIа мукъа хIунда юьйцу?
– Муха – хIунда? Цунна тIера ахь кхо Iайг мер ю!
– ХIунда?
– Кхаа дийнахь шен букъ тIехь лелийна цо со. Хьо лоьхуш.
– БухIано?
– ХIаъ!
– Ахь со лейо, – элира Зу-кIорнис.
– Кхузара меттах ма йолийла со!
– Хьо муха яьлла цуьнан букъа тIе?
– И мел онда ю хаьий хьуна? Букъа тIе хьала а яьлла, дIаяхар-кха. Пхьагал тхойшиннах кхераелла ган езара хьуна!
– Муха?
– Цкъа чорпа малал, тIаккха дуьйцур ду ас.
Чорпех кхин а кхо къурд а бина, бIаьргаш дIакъевлира Зу-кIорнис.
– Муха? – хаьттира цо.
– ХIун?
– Пхьагал муха кхераелира шуьшиннах?
– ХIа! Пхьагаллий? СхьайогIуш ю со БухIанан букъ тIехь. Дуьхьалкхийти-кх… Кхин цхьа Iайг малал. Мел хаза хьожа ю-кх кхуьнан! ЭхI!
Зу-кIорнис къурд бира.
– Лергаш а хьийзош Iаш ю-кх. Ткъа тхойшиъ…
– БухIа а?
– ХIаъ. Хьалакхосаелла и, дIаэккхаш ган езара хьуна! БухIа диттах дIакхетаза ели… БухIанна тIера малал.
– ХIан-хIа. Кхин ца малало. ДIайижийтахьа со.
Зу-кIорни охьа а йижийтина, кетар тIетесира ЧайтаIо цунна.
– Йовха юй? ¬– хаьттира цо.
– Ю, – элира Зу-кIорнис. – БухIанах дерг хьайггара дуьйцуш дарий ахь? Алахьа.
– Дацара дера! Хьо то ма-еллинехь, цхьаьний хахкалур ду вай.
– Хахкалур ду, – халла хезаш элира набаран тар туьйсучу Зу-кIорнис.
