Ростов-на-Дону щыкlогъэ Урысые фестиваль-зэнэкъокъоу «Сэнаущхэм ядунай» зыфиlорэм гъэхъагъэ хэлъэу зыкъыщигъэлъэгъуагъ къуаджэу Шэхэкlэй иансамблэу «Шапсыгъэ нартхэр» зыфиlорэм.
Зэхэщакlохэм зэрэхагъэунэфыкlыгъэмкlэ, Дунэе фестиваль-зэнэкъокъоу «Сэнаущ-хэм ядунай» зыфиlорэр ныбжьыкlэхэм ятворческэ амалхэр къагъэлъэгъонхэмкlэ, амышlэщтыгъэ цlыфхэм нэlуасэ афэхъунхэмкlэ, мыщ фэдэ проект инхэм ахэлэжьэнхэм гуетыныгъэ фыряlэу екlолlэнхэмкlэ амал дэгъоу щытыгъ. Цlыф лъэпкъ зэфэшъхьафхэм якультурэ къэухъумэгъэнымкlэ ыкlи хэхъоныгъэ егъэшlыгъэнымкlэ, къошныгъэ зэфыщытыкlэу лъэпкъхэм азыфагу илъхэр гъэпытэгъэнхэмкlэ ащ фэдэ lофтхьабзэхэм мэхьэнэ ин яl.
Кlэлэцlыкlу къэшъокlо купыр творческэ зэнэкъокъум чанэу хэлэжьагъ. Урысыем ишъолъырыбэмэ къарыкlыгъэ ансамблэ анахь дэгъухэр ащ къекlолlэгъагъэх. Къэшъуитфэу кlэлэцlыкlухэм къашlыгъэхэр лъэшэу агу рихьыгъэх. Ахэр зыгъэхьазырыгъэхэр Лые Артуррэ Аксанэрэ. Зэлъашlэрэ хореографэу Евгений Папунаишвили осэшlхэм тхьамэтагъор адызэрихьагъ.
— Анахь тын лъэпlи 5-у агъэнэфагъэр зэкlэ тэ къэтхьыгъ, — къыlуагъ коллективым ипащэу Лые Артур. — «Ислъамыер», «Хьакlулащэр», «Зэфакlор» ыкlи «Къушъхьэ къашъор» а l-рэ шъуашэ зиlэ дипломхэмкlэ хагъэунэфыкlыгъэх. «Убых къашъор» анахь агу рихьыгъэхэм ащыщыгъ ыкlи фестивалым итын лъапlэ — Гран-при къыхьыгъ. Ижъырэ адыгэ къашъохэм ацlэхэр лъэшэу къыраlохэзэ, цlыфэу яплъыхэрэр lэгу теохэзэ, осэшl купым хэтхэм кlэлэцlыкlухэм дипломхэр, нэпэеплъ шlухьафтынхэр, кубокхэр къаратыжьыгъэх. Мы къэшъокlо купым изичэзыу гъэхъэгъэшхоу ар плъытэн плъэкlыщт. Мылъку lэпыlэгъу къытэзытыгъэхэм лъэшэу тафэраз. Ахэр: Хъущт Айдэмыр, Ныбэ Рустам, Бастэ Айдэмыр ыкlи Картозия Астамур. Джащ фэдэу дгъэсэрэ кlэлэцlыкlухэм янэ-ятэхэми яшlуагъэ къытагъэкlыгъ. Зэкlэми тафэраз. (Адыгэ Макъ)
Нэкlубгъор зыгъэхьазырыгъэр Ныбэ Анзор.
Сурэтхэр авторым къытlэкlигъэхьагъэх.